FIFA 2026-yilgi Jahon chempionatida Eronni Italiyaga almashtirmoqchi emas

FIFA yozda bo‘lib o‘tadigan jahon chempionatida Eron terma jamoasini Italiyaga almashtirishni rejalashtirmayapti, deb xabar bermoqda BBC turli manbalarga tayanib.

Avvalroq AQSh prezidenti Donald Trampning maxsus vakili Paolo Dzampolli shunday taklif bilan chiqqan edi. AQSh va Isroil bilan urush tufayli Eronning turnirda ishtirok etishi borasida noaniqlik saqlanib qolmoqda.

FIFA Dzampollining taklifiga rasmiy izoh bermadi, biroq FIFA prezidenti Janni Infantinonning o‘tgan hafta "Eron jamoasi albatta keladi" degan bayonotiga ishora qildi.

Financial Times gazetasining xabar berishicha, Dzampollining rejasi AQSh va Italiya o‘rtasidagi kelishmovchiliklarni hal qilish uchun bosh vazir Jorja Meloni Trampni Rim papasi Lev XIVga nisbatan bildirgan fikrlari uchun tanqid qilganidan keyin taklif qilingan.

FIFA qoidalariga ko‘ra, agar jamoa ishtirok etishdan bosh tortsa yoki turnirdan chetlatilsa, nima bo‘lishini hal qilish uchun boshqaruv organi "mutlaq huquqqa" ega. Jahon chempionati reglamentining oltinchi moddasida ham shunday deyilgan: "FIFA tegishli ishtirokchi assotsiatsiyani boshqa assotsiatsiya bilan almashtirish to‘g‘risida qaror qabul qilishi mumkin."

Italiya terma jamoasi saralash pley-off bosqichida Bosniya va Gertsegovinadan mag‘lub bo‘lgach, ketma-ket uchinchi bor jahon chempionatiga chiqa olmadi.