ФИФА "ЖЧ-2026" чипталари бўйича Нью-Йоркда текширув остида — нархлар ва маълумотлар шубҳа остида

ФИФА ташкилоти АҚШнинг Нью-Йорк штатида Жаҳон чемпионати чипталари билан боғлиқ ҳолат юзасидан текширувга тортилди. Текширув ЖЧ-2026 доирасида Нью-Жерсида ўтказиладиган саккизта ўйинни, жумладан Англия — Панама учрашуви ва финални ҳам қамраб олади.

Нью-Жерси бош прокурори ва Нью-Йорк штати прокуратураси томонидан эълон қилинган қўшма баёнотда чипта сотув тизими “чалкашлик, сохта танқислик ва ғайритабиий юқори нархлар” билан тавсифланган.

Маълумотга кўра, ҳуқуқ-тартибот идоралари ФИФАга расмий чақирув (субпоена) юбориб, чипта сотиш амалиётлари бўйича маълумот талаб қилган.

Шунингдек, мухлислар чипта харид қилаётганда ўрин жойлашуви ҳақида нотўғри маълумот олгани ҳақида ҳам шикоятлар ўрганилмоқда.

Ҳисоб-китобларга кўра, финал ўйини учун ўртача чипта нархи 13 000 долларга (тахминан 9 556 фунт стерлинг) яқинлашган.