Осиёда биринчи! “Пахтакор” жаҳон рейтингида 44 поғона кўтарилди
"Шерлар" Лондоннинг "Арсенал"идан ўзиб кетди
Швейцарияда жойлашган Халқаро спорт тадқиқотлари маркази – CIES экспертлари дунёнинг 49 та олий дивизион лигасида фаолият юритаётган футбол академиялари битирувчилари сони (15 дан 21 ёшгача бўлган даврда клубда камида 3 мавсум ўтказган футболчилар), улар иштирок этган учрашувлар даражаси, майдонда ўтказган вақти ва ўртача ёш кўрсаткичлари асосида янги йиллик глобал рейтингни эълон қилди.
Янгиланган рейтингда Тошкентнинг “Пахтакор” клуби академияси 50,3 балл билан 46-ўринни эгаллади. Таъкидлаш жоизки, бир йил давомида ушбу академия катта ўсишга эришди. Буни янги рейтинг статистикасидан ҳам билиб олса бўлади.
“Пахткор” академияси 2025 йилги рейтингда 34,1 балл билан 90-ўринни эгаллаганди. Энди 44 поғона юқорилаб, энг кучли элликта футбол академиялари қаторига қўшилди.
Халқаро ташкилот ҳисоботида “Пахтакор” академиясида тарбияланган 59 нафар футболчи фаолияти ўрганилгани акс эттирилган. Уларнинг 6 нафари айни пайтда “Пахтакор”нинг асосий жамоасида ўйнамоқда.
Клуб бу борада Осиё футбол конфедерацияси клублари орасида “топ-60”га кирган ягона жамоа сифатида қитъада 1-ўринни эгаллади.
Халқаро спорт тадқиқотлари маркази – CIES рейтингида “Пахтакор” академияси жаҳон футболида юқори баҳоланувчи Бразилиянинг “Крузейро” (49,8 балл), Украинанинг “Шахтёр” (48,4 балл), Англиянинг “Арсенал” (46,6 балл), Хорватиянинг “Хайдук” (46,2 балл) ва Португалиянинг “Порту” (45,5 балл) клубларини ортда қолдирди.
Умумий рейтингда Португалиянинг “Бенфика” клуби биринчи ўринда қайд этилган. Кучли учликдан эса, Аргентинанинг “Ривер Плейт” ва “Бока Хуниорс” клублари академиялари жой олган.
Изоҳлар (0)