ФИФА мундиалда келишилган ўйинлар бўйича баёнот берди

ФИФА 2026 йилги жаҳон чемпионати ўйинлари давомида шубҳали букмекерлик фаолияти ёки ўйин натижаларини сохталаштириш аломатларини аниқламади. 

Ташкилот ҳузуридаги мусобақалар адолатини таъминлаш бўйича махсус гуруҳ турнир доирасида ўтказилган барча 104 та учрашувни доимий назоратда ушлади. Ишчи гуруҳ аъзолари букмекерлик бозори бўйича маълумотларни тўплаб, ўзаро алмашди, ҳисоботларни солиштириб чиқди ва ҳар қандай номутаносиблик ёки шубҳали ҳолатларни аниқлашга уринишди. Текширув якунига кўра, шубҳа уйғотадиган ҳолатлар қайд этилмади.

Мониторинг жараёнига мусобақага мезбонлик қилувчи мамлакатлар — АҚШ, Канада ва Мексика футбол федерациялари, шунингдек, Осиё, Африка, Шимолий ва Марказий Америка ҳамда Кариб ҳавзаси, Жанубий Америка ва Европа футбол конфедерациялари, шу билан бирга ФБР, Интерпол, БМТнинг гиёҳванд моддалар ва жиноятчиликка қарши бошқармаси, Европа Кенгаши ҳамда Sportradar компанияси жалб этилди.

— ФИФАнинг мусобақалар адолатини таъминлаш бўйича ишчи гуруҳи 2026 йилги жаҳон чемпионати давомида ахборот алмашинуви, эҳтимолий хавфларни баҳолаш ва ўз вақтида чора кўриш учун ишончли тизим яратди. Барча ҳамкорларимизга уларнинг тажрибаси ва ишга садоқати учун миннатдорчилик билдирамиз ва келгуси ФИФА турнирларида ҳам бу ҳамкорликни янада ривожлантиришни режалаштирганмиз, — деди ФИФАнинг мусобақалар адолати масалалари бўйича катта менежери Лиам Рич.

Шу тариқа, ФИФА Испания терма жамоаси ғолиб чиққан жаҳон чемпионати натижаларини шубҳа остига қўйиш учун асос топмади. Энди шу каби мониторинг тизими келгуси мусобақаларда, жумладан, 2027 йилдаги аёллар ўртасидаги жаҳон чемпионатида ҳам қўлланилади.