Final. O‘zbekiston - Saudiya Arabistoni: Uchrashuvdan matnli translyatsiya

Assalomu alaykum, muhtaram futbolsevar do‘stlar!

23 yoshgacha bo‘lgan futbolchilar o‘rtasidagi Osiyo Kubogi finali, O‘zbekiston - Saudiya Arabistoni bellashuvi boshlandi. Quyida mazkur o‘yindan matnli translyatsiya e’tiboringizga havola etiladi.

E’tiboringiz uchun rahmat, aziz muxlislar!

90+5. Uchrashuv yakunlandi. "Sahro lochinlari" "oq bo‘rilar"dan ustun keldi.

90+4. Raqib futbolchilari barcha eshiklarni yopib qo‘yapti.

90+3. So‘nggi soniyalarni oldingi chiziqda o‘tkazyapmiz. Ammo foyda bo‘lmayapti.

90+2. Jarima maydoniga oshirilgan to‘pni Norchaev darvozaga yo‘llay olmadi. Turdalievning urinishi esa, ancha noaniq ketdi.

90. O‘yinning asosiy vaqtiga 5 daqiqa qo‘shildi.

90. Jasur Jaloliddinov o‘z o‘rnini Turdalievga bo‘shatib berdi.

89. Jarima maydoniga katta kuch bilan oshirilgan to‘pni darvozabon ushlab oldi.

88. Har ikki jamoa etakchilari maydonga narsa uloqtirayotgan muxlislarni tinchlantirishga harakat qilyapti.

87. Maydon chizig‘i yaqinida yotgan futbolchini maydonda chiqarishga harakat qilgan Jiyanov saudiyalik futbolchidan zarba qabul qilib oldi. Maydonda dahanaki jang ketmoqda.

86. Standartdan jarima maydoniga oshirilgan to‘pni saudiyalik himoyachilar uzoqlashtirdi.

86. Jasur Jaloliddinov hakamga e’tiroz uchun sariq kartochka oldi.

85. Gol ura olmayotgan futbolchilarimiz asabiylashmoqda. Raqib esa, asabga tegishni davom ettiryapti.

83. To‘p Norchaevning qo‘liga tegdi, demoqda hakam. Takroriy lavha uning haqlinini ko‘rsatdi.

82. To‘p nazorati bo‘yicha mutlaqo tenglik. 50/50.

81. Jarima maydoniga oshirilgan to‘pni darvozabon mushtlari bilar urib yubordi.

80. Hujumlarni davom ettiryapmiz. 

79. Ayman Yahyo maydonda yotibdi. Unga tibbiy yordam kerak, shifokorlar yana zambil bilan chiqib keldi.

77. Kapadze so‘nggi chorani qo‘lladi. Jo‘raqo‘ziev va Fayzullaev Xolmatov hamda Erkinovni almashtirdi.

76. Al-Gamdi maydonda yotibdi. Shifokorlar uni maxsus zambilda maydon tashqarisiga olib chiqdi.

75. Takroriy lavhalar himoyachilarimizning sun’iy ofsayd yaratishda xato qilganini ko‘rsatdi.

74. GOL! Saudiyaliklar oradagi farqni oshirdi.

Al-Buraykan o‘tkir burchakdan zarba berib, darvozani ishg‘ol etdi.

74. Raqib jarima maydoni ichida pala-partish vaziyat. Biroq Muhammadqodir zarba bera olmadi.

73. Jiyanov qoida buzish evaziga to‘xtatildi. Standart vaziyatga egamiz.

72. Videotakrorlarni ko‘rgan hakam o‘z qarorida qoldi.

71. YO‘Q! Ruslan voqealar rivojidan biroz ilgarilab ketgan ekan. Hakam golni inobatga olmadi.

71. GOOOOOOOLLLLLL! Jiyanov to‘pni darvozaga "mixlab qo‘ydi!"

70. Hojimat ikki raqibini aldadi, ammo pas berishga kechikdi. Raqiblar uni zararsizlantirdi.

69. Hamraliev hujumda qoida buzdi. Hakam o‘yinni to‘xtatdi.

68. Hamad Al-Yami Jiyanovga nisbatan ishlatilgan qo‘pollik uchun ogohlantirildi.

67. Futbolchilar biroz asabiylashib ketdi. Hissiyotlarga berilish kerak emas.

65. Qanaqa jarima??? Erkinov to‘pni qoida buzishsiz olib qo‘ydi, ammo hakam...

65. Zaxiradan o‘yinga qo‘shilgan Jiyanov chap qanotni jonlantirib yubordi.

64. "Sahro lochinlari" deyarli hujum uyushtirmay qo‘ydi. Shu tempda davom etish lozim, yigitlar!

63. Super zarba! Jasur Jaloliddinovning zarbasiga biroz aniqlik etishmadi.

63. Tashabbus to‘liqligicha vakillarimiz tomonga o‘tdi.

62. Yaxshi kombinatsiya va jarima maydoniga pas. Ammo to‘pni darvozaga yo‘llaydigan hujumchi topilmadi.

61. Erkinovning uzatmasidan so‘ng Norchaev to‘pga eta olmadi.

60. Referi Saudiya Arabistoni bosh murabbiyi Saad Al-Shehrini sariq kartochka bilan jazoladi.

59. Bo‘riev markazda qoida buzdi. Hayriyat, referi og‘zaki ogohlantirish bilan cheklandi.

58. Nazorat asta-sekinlik bilan vakillarimga qaytmoqda. Saudiya qarshi hujumda o‘z imkoniyatini kutyapti.

57. Abdumajidov va Jiyanov o‘yinga qo‘shildi. Ular Hoshimov hamda Mirsaidovni almashtirdi.

56. Jasurga qarshi personal harakat qilishyapti. Unga oson bo‘lmasligi aniq edi.

55. Pas berishni paysalga solgan Jaloliddinov to‘pni oxir-oqibat oldirib qo‘ydi.

54. Vakillarimizda aniq o‘yin uslubi ko‘rinmayapti.

53. Al-Eysa ikki futbolchimizni "echib ketdi". Uni qo‘pollik evaziga to‘xtatishdi.

52. Mirsaidov ogohlantirildi. Al-Gamdi maydonda yotibdi.

51. Havodagi to‘p uchun kurashda Norchaev imkoniyatni boy berdi.

50. Gol o‘tkazib yuborgan vakillarimiz raqibni to‘psiz qoldirishga harakat qilyapti.

49. GOL! Uchrashuvda hisob ochildi.

Raqib futbolchisi uzoq masofadan darvozamizni ishg‘ol etdi. 

46. Birinchisida bo‘lganidek, ikkinchi 45 daqiqalikda ham raqib futbolchilari to‘p nazoratini qo‘lga olishni boshladi.

46. Ikkinchi taymga start berildi!

46. Futbochlilar maydonga qaytdi. Biz ham qaytamiz!

45+6. Birinchi taymda hisob ochilmadi. Tanaffus!

45+5. Nazarov yana bir marta qo‘pol xatoga yo‘l qo‘ydi. Hayriyat, darvozabonimiz o‘z ustidan oshirib yo‘llangan zarbani qaytara oldi.

45+4. Qo‘shimcha daqiqalarda kichik to‘xtalishlar bo‘lgani uchun o‘yin hamon davom etmoqda.

45+3. Markazda Saidazamatga nisbatan qoida buzgan Ayman Yahyo ogohlantirildi.

45+2. Saudiyalik futbolchiga tibbiy yordam ko‘rsatilmoqda.

45+1. Mirsaidovning zarbasidan keyin to‘p himoyachiga tegib, maydonni tark etdi.

45. Birinchi taymga 3 daqiqa qo‘shildi.

44. Hakamga e’tiroz bildirgan Kapadze murabbiylari shtabi a’zosi sariq kartochka bilan ogohlantirildi. Referi bizning foydamizga qaror chiqagan bo‘lsa, nima kerak shu?!

43. HA! Penalti bekor qilindi. To‘p uchun kurashgan futbolchi o‘yindan tashqari holatda ekan. 

42. Referi vaziyatni o‘z ko‘zlari bilan ko‘rish uchun maydon chetiga yo‘l oldi. Katta ehtimol bilan penalti bekor qilinadi.

41. Ehtimoliy ofsayd tekshirilyapti. 

41. VAR ham vazityatni o‘rganmoqda.

40. Jaloliddinov boshchiligidagi futbolchilarimiz hakamga jiddiy e’tiroz bildirmoqda.

39. Alibek Davronov jarima maydoni ichida qo‘pollik ishlatdi. Hakam penalti belgiladi.

38. Nazarov to‘pni uzoqlashtirishda xatoga yo‘l qo‘ydi. Uyg‘onish kerak, yigitlar!

37. Futbolchilarimiz pressingda yaxshi ishlayapti.

36. Davronov "korpus" bilan juda yaxshi harakat qildi. Juda yaxshi.

35. Kapadze shogirdlari tempni oshirmoqda. Raqib ham sarosimaga tusha boshladi.

33. Olis masofadan berilgan zarbani Nazarov qaytardi. 

32. Erkinov??? Hojimat deyarli birga-bir vaziyatdan gol ura olmadi. Afsus...

30. To‘p markazda deyarli turmayapti. 

29. Xolmatovning olis masofadan bergan zarbasini darvozabon ushlab oldi. Yaxshi!

28. To‘p nazorati futbolchilarimizda. Raqib engil pressing qo‘llayapti.

27. Norchaev o‘yindan tashqari holatda qolib ketdi. Hakam o‘yinni to‘xtatdi.

26. Jasurning jarima maydoniga oshirgan to‘pini darvozabon mushtlari bilan urib, jarima maydonidan uzoqlashtirdi.

25. Burchak zarbasiga egamiz. To‘p yonida Jaloliddinov.

24. Jarima maydonimiz ichida sarosimali vaziyat. Hayriyat, so‘nggi pallada himoyachilarimiz xavfni bartaraf etdi.

23. Chap qanotdan yorib kirishga harakat qilgan Erkinov to‘pni yo‘qotdi.

22. Saudiyaliklar standart vaziyatga ega bo‘ldi. Bu erdan jarima maydoniga to‘pni oshirish mumkin.

20. Jarima maydoniga oshirilgan to‘pni himoyachilarimiz uzoqlashtirdi.

18. Raqib futbolchilari ham faollikni oshiryapti. Nazarov biroz hayajonlana boshladi.

16. Kapadze shogirdlari pressing uyushtirishni davom ettirmoqda.

15. Dastlabki 15 daqiqada gol urilmadi. Endi temp nisbatan pastlasa kerak.

13. Hozircha paslar bo‘yicha ustunlik vakillarimiz tomonda. Nazorat ham bizda!

12. O‘ng qanotda yaxshi hujum uyushtirdik. Ammo jarima maydoniga oshirilgan to‘pni raqib uzoqlashtirdi.

11. Hakam bugun yakkakurashga qo‘yib beradi, chog‘i. Elkama-elka kurashlar ko‘p bo‘lyapti.

10. Temp biroz pasaydi. Futbolchilar biroz sekinlashdi.

8. Vakillarimizda oldindan o‘ylangan kombinatsiyalar borligi yaqqol sezilib turibdi.

7. Endi saudiyalik futbolchi maydonda yotibdi. Referi Erkinovni og‘zaki ogohlantirdi.

6. Shifokorlar maydonga tushib, Husainga tibbiy yordam ko‘rsatdi. Jiddiy qo‘pollikni hakamdan boshqa hamma ko‘rdi.

5. Norchaev maydonda yotibdi. Hakam vaziyatga e’tibor ham bermadi...

4. Saudiyaliklarning rejasida tezkor borligi aniq. Ular ko‘pchilik bo‘lib oldinga tashlanmoqda.

3. Sprinterlik bahsida Hoshimov raqibiga engildi. Hechqisi yo‘q! Keyingi safar yaxshiroq harakat qilamiz.

2. Katta tezlik olgan raqib futbolchisini Bo‘riev ustaomonlik bilan to‘xtatdi. Yashavor! 

1. Raqib ilk soniyalardan faollik namoyish etdi. Ammo hujum zarba bilan yakunlangani yo‘q.

1. O‘yin boshlandi!

18:57. Har ikki jamoa sardorlari hakamlar ishtirokida bahsni kim boshlashi borasida kelishib oldi. Start uchun barchasi tayyor.

18:55. O‘zbekiston Respublikasi davlat madhiyasing yangramoqda. Uni barchamiz birgalikda kuylamiz!

18:54. Saudiya Arabistoni davlat madhiyasi yangradi!

18:53. Futbolchilar maydonga tushib keldi. Bahs bir necha daqiqa ichida start oladi.