Формула-1. Монако ГП: Антонеллидан “Катта дубулға”, Хэмилтон иккинчи, Верстаппен стартдаёқ пойгани тарк этди

“Мерседес” ҳайдовчиси Андреа Кими Антонелли Монако Гран-присида “Катта дубулға” (Grand Slam) билан ғалаба қозонди. “Феррари” вакили Льюис Хэмилтон иккинчи, “Ред Булл” пойгачиси Исак Хаджар эса учинчи ўринни эгаллади.

Старт “Ред Булл” учун кутилмаган муваффақиятсизлик билан бошланди: иккинчи позициядан пойгани бошлаган Макс Верстаппен жойидан қўзғала олмади, бутун пелотонни ўтказиб юборди ва кейинчалик боксга кириб, пойгани тарк этди.

Шу тариқа Антонелли пешқадамликни қўлга олди. Унинг ортидан Хэмилтон, Леклер ва Хаджар жойлашди. Норрис эса Гаслига бир позицияни бой бериб, биринчи айланани саккизинчи ўринда якунлади.

Антонелли тезда Хэмилтондан узоқлаша бошлади ва бешинчи айлана якунига келиб унинг устунлиги тўрт сонияга етди. Хэмилтон эса ўз навбатида Леклердан уч сонияга илгарилаб кетди.

Пойганинг биринчи чорагида фарқлар барқарорлашди ва позиция учун кураш фақат Хаджар–Расселл ҳамда Гасли–Норрис жуфтликлари орасида сақланиб қолди. 20-айланада “Ред Булл”нинг француз ҳайдовчиси двигатель билан боғлиқ муаммолардан шикоят қилди. Шу пайтга келиб Антонеллининг Хэмилтонга нисбатан устунлиги олти сонияга етган, “Феррари” пойгачилари ўртасидаги фарқ ҳам шунча эди.

29-айланада Льюис етакчилар орасида биринчи бўлиб боксга кирди. У "Hard" шиналарини олиб, трекка учинчи ўринда қайтди. Тўрт айлана ўтиб Расселл ҳам пит-стоп амалга оширди, бироқ саккизинчи бўлиб қайтди. “Ред Булл” тезкор жавоб қайтарган бўлса-да, Хаджар “Мерседес” ҳайдовчисига ўз позициясини бой берди.

Хэмилтон ва Расселл пит-лейнда тезликни оширгани учун беш сониялик жарима олди.

36-айланада “Феррари” Леклер учун иккинчи пит-стопни амалга оширди. Монаколик пойгачи трекка учинчи бўлиб қайтди ва етакчидан 12 сония ортда эди. Кейинчалик Антонелли ҳам шиналарини алмаштирди ва катта устунлик билан етакчиликни сақлаб қолди.

45-айланада Расселл ва Хаджар кутилмаганда Норрисни ортда қолдирди. Бу амалдаги жаҳон чемпионининг двигатель муаммолари янада кучайганини кўрсатди. Британиялик боксга қайтиб, кетма-кет иккинчи пойгада ҳам маррага етиб бора олмади.

Пиастри эса етакчи гуруҳдаги стартдаги шиналарда қолаётган ягона ҳайдовчи бўлиб қолди. Фақат 50-айланада у "Hard" шиналарини олди ва натижада Расселл ҳамда Хаджардан ортда қолди.

“Уильямс” жамоаси ўтган йилги стратегияни такрорлашга уринди: янги шиналардаги Албон Сайнснинг пит-стопи учун вақт захирасини яратиши керак эди. Бироқ тактика иш бермади ва Албон Линдбладдан ҳам ортда қолиб, кучли ўнликдан чиқиб кетди.

60-айланада Лэнс Стролл 19-бурилишда тўсиққа урилгач, хавфсизлик машинаси трекка чиқди. Етакчи гуруҳдаги аксарият пойгачилар, жумладан Хэмилтон ва Леклер ҳам боксга киришди. Натижада улар беш сониялик жарималарини айнан шу икки карра пит-стоп давомида ўташга мажбур бўлди.

Антонелли трекка 30 сониялик устунлик билан қайтди, Расселл эса Хаджардан ортда қолиб, тўртинчи ўринга тушди. Бундан ташқари, у жаримасини ўтамагани учун пит-лейндан ўтиб чиқиш жазоси олди.

Рестартдан олдин хавфсизлик машинаси яна трекка қайтишга мажбур бўлди: Леклер охирги бурилишда машинасини деворга урди. Натижада пойга қизил байроқ билан тўхтатилди.

Асфальт қопламаси шикастлангани сабабли пойга рестарти ярим соатга кечикди. Антонелли ва Хэмилтон етакчи позицияларини сақлаб қолди. Расселл Хаджардан ўтиб, учинчи ўринга кўтарилди, бироқ икки айлана ўтиб жаримасини ўтади ва 14-ўринга тушиб кетди. Гасли ва Хаджар учинчи ҳамда тўртинчи ўринларга кўтарилди, аммо иккаласи ҳам ҳакамлар текшируви остида эди.

Якунда Антонелли “Катта дубулға” билан ғалаба қозонди ва Хэмилтонни олти сония ортда қолдирди. Гасли олган жарима туфайли Хаджар учинчи ўринга кўтарилди, “Альпин” аъзоси эса еттинчи поғонага тушиб кетди. Шу билан бирга, “Ред Булл” пойгачиси Исакнинг ўзи ҳам пойгадан кейинги текширув остида қолмоқда.