Фозил Мусаев: "Турон" албатта Суперлигага қайтади"

Тажрибали ярим ҳимоячиларидан бири Фозил Мусаевни яқинда “Металлург” клуби билан шартнома имзолагани ҳақида сайтимиз орқали хабар бергандик.

Биласиз, Мусаев ўтган мавсумни “Турон” жамоасида ўтказди. У ерда Суперлига баҳсларида 20 та учрашувда майдонга тушиб 2 марта гол урди. Кубок доирасида эса 3 та ўйинда “Турон” шарафини ҳимоя қилди. Клуб билан тузган шартномаси тугагани учун эркин агентга айланди ва “Металлург”дан тушган таклифни қабул қилди.

Фозил “Турон” билан дўстона тарзда хайрлашди. У ўзининг инстаграмдаги саҳифасида қуйидагиларни ёзди:

“Турон” раҳбарияти, ўйинчилари ва мухлисларига клубда тўп сурган давримдаги вақт мазмунли ўтгани учун барчаларига миннатдорлик билдириб қоламан. Тўғри, жамоада ўзимиз хоҳлаган натижаларни қайд эта олмадик. Бироқ мана шундай ўйинчилар билан елкама-елка тўп суриш жуда мароқли бўлганлигини алоҳида таъкидлаб ўтишим жоиз. Шунингдек, клубнинг жонкуяр ишқибозлари бизни ҳар қандай ҳолатда ҳам ажойиб тарзда қўллаб-қувватлаганлари сира ёдимдан чиқмайди. Шуни ишонч билан айтишим керакки, “Турон” клуби келгуси йили албатта Суперлигага қайтади. Бу йўлда жамоага омад ёр бўлишини тилаб қоламан. Ҳаммага яна бир бор катта раҳмат!”