ФР: "Сурхон" иккита қарзидан қутулди, лекин...

Суперлиганинг жорий мавсумида анча қувноқ футбол кўрсатаётган Термизнинг "Сурхон" клуби жамоатчиликнинг йил аввалидаги хавотирли муносабатини ижобий тарафга ўзгартира олди.

Лекин жамоанинг яшил майдон ташқарисида каттагина муаммолари тугатилмаганини унутмаслик керак. Пайқаган бўлсангиз керак, гап "Сурхон"нинг эски қарзлари ҳақида кетяпти.

SPORTS.uz'га маълум бўлишича, клуб ўз ҳаққини ундира олмаганидан кейин ОФКга мурожаат қилган Шавкат Абдихўжаев ҳамда Россиянинг "Сила" юридик компанияси орқали ЎФА эшигини "тақиллатган" Баҳром Ҳайдаров олдидаги мажбуриятини бажарди. Олдинги йиллар "Сурхон" мураббийлар штабида фаолият юритган ҳар 2 мутахассис рози қилинган.

Лекин бу "хамир учидан патир", холос. Ҳали ёпилиши керак бўлган "ҳисоб"лар анчагина. Вазирлар Маҳкамасининг 6 январдаги 4-сонли қарори билан клубнинг кредитор қарздорлиги Сурхондарё вилояти ҳокимлиги томонидан (10 январгача) бартараф этилиши белгиланган бўлса-да, ҳануз мақтовга арзигулик ҳеч нарса қилинмади.

Вақт эса тобора кам қоляпти. ОФК лицензиялаш жараёнининг хулосаларини май ойи охирида эълон қилади. Агар клубнинг эски қарзлари масаласи ижобий ҳал қилинмаса, халқаро лицензиядан қуруқ қолиши мумкин. Бу эса "Суперлига ва Про лига регламенти"нинг 10.2-банди ишга тушишига сабаб бўлади. Яъни, "Сурхон" 2024 йилги мавсумни қайси лигада ўтказиши сўроқ остида қолади.

Умид қиламизки, барча муаммолар тезда бартараф қилинади. Акс ҳолда, эндигина чиройли ва очиқ футболи билан мухлисларини хурсанд қила бошлаган Термиз клуби қуйи лигага тушириб юборилиши мумкин...

Фахриддин Рўзиев