Футболчилар уюшмаси тер Штегенни қўллаб-қувватлади

Испания футболчилари уюшмаси (AFE) "Барселона" клуби дарвозабони Марк-Андре тер Штегенни жамоа раҳбарияти билан келиб чиққан зиддиятда расман қўллаб-қувватлади.

Аввалроқ хабар қилинганидек, каталонияликлар тер Штегеннинг жароҳати ҳақида расмий хулоса тайёрлаб, уни Ла Лигага тақдим этмоқчи эди. Бу ҳужжатда немис голкиперининг тўлиқ тикланиши тўрт ой вақт олиши қайд этилган. Мазкур ҳужжат Ла Лига қоидаларига мувофиқ, "Барселона"га янги футболчини расман рўйхатдан ўтказиш имконини бериши мумкин.

Бироқ, тер Штеген бу ҳужжатни имзолашдан бош тортди. Клуб раҳбарияти эса бу қаршиликка жавобан унга нисбатан жазо чоралари қўллаш имкониятини кўриб чиқмоқда. Улар бу борада Ла Лига ва AFE ўртасидаги жорий коллектив шартномага таянишлари мумкинлиги айтилганди.

Шунингдек, RAC1 радиостанцияси тарқатган маълумотга кўра, AFE тер Штегенга мурожаат қилиб, унинг позициясини қўллаб-қувватлади ва клубнинг унга нисбатан қандайдир интизомий чоралар кўриши ҳеч қандай ҳуқуқий асосга эга эмаслигини билдирди.

Футболчилар ташкилоти таъкидлашича, ушбу вазиятда "Барселона"нинг ҳаракатлари шахсий маълумотларни ҳимоя қилиш тўғрисидаги қонун ва футболчиларнинг меҳнат шартлари бўйича жорий келишувга зиддир.

Ҳозирча посбон ўз позициясини сақлаб турибди ва клуб раҳбарияти билан учрашув ўтказишга рози бўлгани йўқ.