Ғалабаларда фақат ўзимнинг ҳиссам бор демоқчи эмасман - ўз дарвозасидан гол ўтказмаётган Лобанов хусусида

Кўпчиликка яхши таниш бўлган дарвозабон - Александр Лобанов “Металлург”да ўзига билдирилган ишончни оқлаб келмоқда. Дарвозабон ярим жамоа, деб бежизга айтишмайди. Бу борада Лобанов “Металлург”га ўз тажрибаси билан ёрдам бермоқда.

Чемпионатимизга қайта старт берилганидан сўнг, Лобанов ўз дарвозаси дахлсизлигини сақлаб келмоқда. “Локомотив” ҳамда “Андижон” майдонларида қўлга киритилган ишончли ғалабаларда шубҳасиз унинг ҳам ҳиссаси катта бўлди. Олдинда эса “Металлург” ва унинг дарвозабонини “Навбаҳор”га қарши яна бир жиддий беллашув кутмоқда.

Ўз ўрнида, бекободликлар посбони Sports.uz сайти учун “Металлург”нинг ишончли ўйинлари сабаби, “Локомотив” билан “Андижон”га қарши беллашувлар ва ўз дарвозаси дахлсизлигини қандай сақлаб келаётгани ҳақида ўз фикрлари билан ўртоқлашди.

“Пахтакор”га қарши учрашувни ҳисобга олмасак, қолган баҳсларда яхши ўйнадик”

- Менимча, бизда барибир яхши жамоа йиғилган, ҳаммамиз бири-биримизни қўллаб-қувватлаймиз ва яхши ўйин намойиш этяпмиз. Умуман, жамоа яхши шаклланган бўлса, натижа ҳам келади. Биринчи навбатда жамоа яхши бўлиши керак, Яратганга шукрки, бизда ҳамма бир-бири учун қайғуради. Янги ўйинчилар келибоқ, жамоага киришиб кетишди. Агар «Пахтакор»га қарши ўйинни ҳисобга олмасак, қолган барча учрашувларда яхши кўриндик ва жамоа сифатида кучли бўлдик. Умуман олганда, мавсумнинг қолган қисми учун биз ўз олдимизга юқори мақсадларни қўямиз ва агар ўйинларга тайёр турсак ҳаммаси яхши бўлади. Ҳар доим майдонга фақат ғалаба учун тушамиз. Мураббий томонидан берилган вазифаларни бажаришга ҳаракат қиламиз.

лобанов_1

“Вазифам – дарвозамдан гол ўтказиб юбормаслик”

- “Локомотив”га қарши ўйинга барча ўзини бошқача руҳда тайёрлади. Кучли рақибга қарши беллашувда дарвозабоннинг зиммасига ҳам катта юк тушади. Бундай учрашувда посбон шерикларига панд бериб қўймаслик пайида бўлади. “Андижон” билан беллашув ҳам жуда яхши ўтди ва кўрган бўлсангиз биринчи бўлимда иккита гол урдик. Доимо майдонга ўз дарвозамдан гол ўтказиб юбормаслик вазифасини зиммамга олиб тушаман. Агар рақиб гол урганида борми, ўйин биз учун янада оғир кечарди. Бизда жамоавий руҳ кучли бўлиб, шунинг эвазига рақиб устидан ғалаба қозондик. Бизда бутун жамоа ҳимояланади, бутун жамоа ҳужумга ўтади. Ҳар бир дарвозабоннинг вазифаси эса  ўзига ишониб топширилган жойни муносиб қўриқлашдани иборатдир. Қўлга киритилган ютуқларда эса фақат ўзимнинг ҳиссам бор демоқчи эмасман. Ғалаба бутун жамоаники.

“Биз учун ҳар бир баҳс ҳаёт-мамот жангидек”

- Албатта, узоқ давом этган танаффусдан кейин олдингидек жамоавий ўйинни изига тушириш осон бўлмайди. Бунинг учун ҳар бир беллашувга алоҳида тайёргарлик кўриш талаб қилинади. Ўзимизни ўйиндан-ўйинга ўтган сайин тобора яхшироқ тайёрлаб боришга ҳаракат қилмоқдамиз. Майдонда эса исталган рақиб ғалабани қўш-қўллаб топшириб қўймайди. Шукрки, “Локомотив” майдонида ишончли ғалабани қўлга киритдик ва бу бизга кейинги ўйинларда қўшимча куч ва далда бағишламоқда.

Ўз навбатида айтишим керакки, учрашув давомида беш бор ўйинчи алмаштириш борасидаги қарор айни муддао бўлди. Бизнинг жамоа ҳар бир ўйинга ўз олдига аниқ мақсад қўйган ҳолда тушяпти ва бунга имкон қадар эришмоқда. Биз учун ҳар бир беллашув ҳаёт-мамот жангидек кечмоқда. Асосийси, машғулотларда ўйлаб қўйган режаларимизни ўйинда яхшироқ амалга оширишга эришяпмиз. Хабарингиз бор, расмий ўйинларга тайёргарлик чоғида ҳеч бир рақиб билан ўртоқлик учрашувларини ўтказмагандик. Фақат машғулотларга зўр бердик. Шунга қарамай, биз расмий баҳслар чоғида мураббийларимизнинг кўрсатмаларига амал қилган ҳолда ўйнаяпмиз ва бунинг эвазига керакли натижаларни қўлга киритяпмиз.

 

Матнда хатолик топсангиз, ўша хатони белгилаб, бизга жўнатинг (Ctrl + Enter)

Фикрлар

Фикр қолдириш учун авторизациядан ўтинг!
Abbos Axmedov
27/06/2020 21:03
Ва лабанов 1:3 та топ куйиб юборди мана сизга лабанов
Jasurbek Dadajonov
26/06/2020 23:24
Ertaga kõramiz Labanovjon Navbahor boradi Navbahor...