Ғалати таклиф: “Реал” Модричга икки ҳафталик шартнома берди

“Реал” раҳбарияти 30 июнь куни клуб билан ҳамкорлик шартномаси тугайдиган икки нафар тажрибали футболчи – Лука Модрич ва Лукас Васкес бўйича ғалати қарорга келди.

AS нашрининг ёзишича, хорватиялик плеймейкер ҳам, испаниялик ҳимоячи ҳам клуб томонидан  икки ҳафта давом этадиган янги битим олди.

“Қироллик клуби” тажрибали ўйинчиларидан фақат клублар ўртасидаги жаҳон чемпионати давомида фойдаланмоқчи. Янги форматдаги мусобақа ташкилотчиси ФИФА иштирокчи клубларга шартномаси тугаётган ўйинчилари билан қисқа муддатли янги келишув тузишни тавсия қилган.

“Реал” мутасаддилари жорий чемпионатдан кейин Лукас Васкес билан хайрлашиш масаласида бир қарорга келиб бўлган. Клуб “Олтин тўп” соҳиби Лука Модрични яна бир йилга Мадридда олиб қолиши мумкин. Бунинг учун хорватиялик 39 ёшли футболчи маошининг кескин пасайиши ва иккинчи даражали ролга ўтишига розилик бериши керак.