Гари Невилл ЖЧ-2026 ғолибини башорат қилди

«Манчестер Юнайтед» клуби ва Англия терма жамоасининг афсонавий собиқ ҳимоячиси Гари Невилл 2026 йилги жаҳон чемпионатида қайси терма жамоа ғолиб чиқиши ҳақида ўз тахминларини билдирди.
 

— Менимча, жаҳон чемпиони Франция бўлади. Бу терма жамоада тўп назоратини ушлаб туриш учун зарур бўлган жисмоний, руҳий ва техник жиҳатдан етук футболчилар тўпланган. Улар кескин қарши ҳужумга чиқишни ҳам жуда яхши билади. Франция бошқа жамоаларга нисбатан тезроқ мослаша олади, шу боис мен айнан шу терма жамоа жаҳон чемпиони бўлишини кутаяпман. Албатта, мен ҳар доим Англия терма жамоасига ишонаман, бизда ғалаба қозониш имконияти борлигини таъкидлаб келаман. Ҳозирги таркиб жаҳон ва Европа чемпионатларида титулга қай даражада яқинлаша олишини кўрсатиб бўлди. Лекин бу сафар ички ҳис-туйғуларим биз учун йўл унчалик осон бўлмаслигини айтаяпти, — дея фикр билдирган Невилл.
 

Мутахассислар ҳам 2026 йилги жаҳон чемпионатидаги асосий даъвогарлардан бири сифатида Франция терма жамоасини тилга олишмоқда. Шунингдек, Испания терма жамоаси ҳам бош фаворитлар қаторидан ўрин олган.