Ғофуров: "Чемпионатда шунчаки қатнашмаймиз, бу оддий клуб эмас"

Якунига етган чемпионатда тажрибали Мирзоҳид Ғофуров “Нефтчи”нинг Суперлигадаги барча – 26 та учрашувида тўлиқ иштирок этди. У фақат икки марта алмаштирилди холос. Қолган барча баҳсларда бошидан охиригача ўйнади.

“Нефтчи” ушбу етакчисини ўзида сақлаб қолишга эришди. Шундан сўнг Sports.uz мухбири футболчи билан боғланди.

- “Нефтчи”нинг илк йиғинида кўриниш бермаганингиз турли гап-сўзларни келтириб чиқарди...

- “Нефтчи”даман. Фақат енгил жароҳат борлиги сабабли мураббийлар дам беришди. Даволаниб олдим. 24 декабрь куни жамоамизнинг биринчи йиғини тугади. Худо хоҳласа, январь ойида бошланадиган машғулотларга қўшиламан. Шартномам тугаганди, лекин янгиси бўйича ҳаммасини келишиб, ҳал қилдик. Мураббий чемпионат тугамасидан олдин менга кейинги йилга ҳам ишонч билдиряпман, яна бирга ишлаб, ҳамкорликни давом эттирайлик, дея таклиф билан чиққан. Биз бир-биримизга 100 фоиз ишонамиз.

- Хизматингизга бошқа клублардан таклифлар ҳам бўлди-а?

- Ҳа, бўлди. “Нефтчи”да бир йил ўйнадим, уйимга яқин жой. Жамоага кўникиб кетганман. Бу оддий клуб эмас. “Нефтчи” – бу бренд жамоа. Про лигадан чиққанидан кейин олдига катта мақсадлар қўйиляпти. Айниқса, “Нефтчи”ни олдинги мавқеига қайтариш асосий масала. Шу вазифа йўлида биз ҳам ёрдам бермоқчимиз. Ушбу сабаблар туфайли яна “Нефтчи”да қолишга қарор қилдим.

- “Нефтчи”да ўтказган дебют мавсумингизда сиз учун қандай ижобий ва салбий томонлари сезилди?

- Биринчи даврада ўхшамади. Бу ҳақида кўп гапирилди, яна қайтаришимиз мумкинки, омадсизлик ва жароҳатлар ўз таъсирини кўрсатди. Иккинчи даврада вазият жойига тушди. Умумий маънода, ижобий дея оламан. Шароитлар ҳам кўнгилдагидек. Ҳамма биладики, Фарғона вилояти ҳокими сифатида футболга жуда қизиқадиган Хайрулла Бозоров ишлаяпти. Шундай экан, барча нарса кўнгилдагидек.

- “Нефтчи” бош мураббийи Виталий Левченко сизни кўпроқ қайси томонлама ҳайрон қолдиряпти?

- Ҳамма мураббийни ўйин услублари бор. Уларни бир-бирига таққослаш тўғри келмайди. Мураббийлар ҳар хил бўлади. Левченко тактик томонлама ҳам яхши мутахассис. У билан яхши ишладик. Клубга келиб, “Нефтчи”ни олиб қолди ва қайтанга янада яхшироқ натижа кўрсатилди.

- Таркибда ўзгаришлар бўляпти. Янги ўйинчилар билан шартномалар имзоланяпти, яна янгилари келяпти. Бу каби ўзгаришларга фикрингиз қандай?

- Олдиндан бир нарса деб бўлмайди. Агар гапирмоқчи бўлсангиз ҳар қанча гапираверасиз. Муҳими, яхши ҳолатда тайёргарлик кўряпмиз. Селекция ҳам шунга яраша давом этяпти. Ким қандайлиги ўйинлар мобайнида кўринади.

- “Нефтчи”га совринли ўринлар учун курашиш вақти келдими?

- Потенциали етади. Лекин олдиндан нима бўлиши ёлғиз Аллоҳга аён. Биз бир нима дея олмаймиз. Аммо ҳар сафар мақсадни катта қилиб, яхши ният қилавериш керак. Юқори вазифалар бўлса, шунга яраша интилиш ҳам бўлаверади. Шунинг учун мақсадимиз баланд. Чемпионатда шунчаки қатнашмаймиз.

Шуҳратбек Жўраев.