Грузия президенти футболчиларни орден билан тақдирлади. Мухлислар ҳам ўз қаҳрамонларини ажойиб тарзда кутиб олди

3 июль, 11:00
0
Футбол

Грузия терма жамоаси футболчилари "Евро-2024"даги ўйинларидан сўнг "Шон-шараф" ордени билан тақдирланди.

Грузия терма жамоаси "Евро-2024" 1/8 финалида Испанияга имкониятни бой берди (1:4). Бу грузинларнинг Европа чемпионатидаги дебюти эди.

Мамлакат президенти Саломе Зурабишвили терма аъзоларини, шунингдек мураббийлар штаби ва футбол федерацияси вакилларини "Шон-шараф" ордени билан тақдирлади. Тақдирлаш маросими Тбилисидаи "Озодлик" майдонида ўрнатилган саҳнада бўлиб ўтди.

Мухлислар Германиядаги чемпионатдан қайтган футболчиларни кутиб олган, Зурабишвили саҳнага чиқиб, миллий терма жамоа футболчилари, бош мураббий Вилли Саньоль, мураббийлар штаби вакиллари ва футбол федерацияси раҳбариятига мукофотни топширди.

Терма футболчилари "Михаил Месхи" стадионидан очиқ автобузда "Озодлик" майдонига боришди. Йўл-йўлакай минглаб мухлислар Грузия терма жамоаси футболчиларини кутиб олишди.

"Шон-шараф" ордени Грузиянинг давлат мукофоти бўлиб, давлат ва жамоат фаолиятининг турли соҳаларида қилган хизматлари учун мамлакат фуқароларига берилади. Орден билан тақдирланганлар орасида актёр Вахтанг Кикабидзе, режиссер Эльдар Рязанов, хонанда Зураб Соткилава ва футболчи Манучер Мачаидзе бор.

Айтиш керак, гуржистонлик футболчилар Европа чемпионатида "F" гуруҳидан жой олган ва мазкур квартетда 4 очко тўплаб, энг яхши учинчи ўринлардан бири сифатида плей-офф босқичига чиқди. Жамоанинг энг ёрқин натижаси 3-турда турнир фаворитларидан бири бўлган Португалияни мағлуб этгани бўлди. Айнан мазкур беллашувдаги ғалаба Саньоль шогирдларига нимчорак финал йўлланмасини тақдим этди. Нимчорак финалдаги мағлубиятдан (Испания билан баҳсда 1:4 ҳисобидаги) қатъи назар, мазкур натижа Грузия футболи учун улкан ютуқ сифатида қабул қилинди.

Аслида, терма "Евро-2024"га қадар ҳам оғир йўлни босиб ўтган ва турнирга йўлланма берувчи ўтиш ўйинида Грецияни бир киши кам бўлиб ҳаракат қилиб, пенальтилар сериясида таслим этганди (0:0, 4:2).

Грузия терма жамоаси "Евро-2024" турнирини 1 ғалаба, 1 дуранг ва 2 мағлубият билан якунлади. Жамоа жами 5 та гол урди ҳамда ўз дарвозасидан 8 та тўп олиб чиқди.