Гусков қотил кийимида, Ян Мерабни дудуқлантириб қўйди, Пантожадан камтарона жавоблар, Вандан иддаоли сўзлар, Морено, Сеҳудо, Телбот, Тайра, Блахович нималар деди?

"UFC 323" турнирининг матбуот анжумани ортда қолди. Келинг, унда нималар бўлганини кўриб чиқсак!

Мераб ушбу жангда яна-да техникасига таянишини, Ян ғалаба қозонишни истаса, уни нокаут қилиши кераклигини айтди. 

Пётр: "Биринчи жангда ўнг қўлимда жароҳат бор эди, шу боис бир қўл билан курашганман", деди. Мераб эса "бу баҳс учун қандай баҳонанг бор", деган савол билан юзланди, Ян эса "100 % жангга тайёрман, ҳеч қаеримда муаммо йўқ, ҳар бир машина кун келиб бузилади," деб жавоб қайтарди. Бу эса Двалишвилининг лақабига отилган "тош" эди.

Қолаверса, жакузи мавзуси яна очилди. "UFC 311" матбуот анжуманида очилган бу очилдастурхон ҳалигача ёпилмади (Маълумот учун, "UFC 311" турнирининг марказий жанги Царукяннинг жароҳати сабаб Ислом ва Мойкано, иккинчи марказий тўқнашув Умар ва Мераб орасида бўлиб ўтган эди). Ўша пайт журналист Махачевга "Умар билан боғлиқ энг чиройли хотиранг қайси?" деган саволига Ислом "Унинг чемпиионлик..." деб гап бошлаши билан ҳамоноқ Мераб "Жакузи қандай, жакузи" деган эди. Ушбу видео эса ижтимоий тармоқларда вирусдек тарқалиб кетганди. Умар эса мен у ерда йўқ эдим, дея жаҳли билан жавоб қайтарди. Гуржистонлик Интернетдаги Хабиб жамоасининг жакузидаги расмини назарда тутган эди. Кейинчалик Ариэль Хельванининг интервьюсида кўриниш берган Мераб журналистнинг "Умар у ерда йўқ эди", деган гапига Мераб "қандай қилиб у йўқ бўлади, менимча, у расмга олаётганди" деганди. Кейинчалик Мераб эркаклар билан тўла жакузида Умарга киноя қилганди ва "Умарни чақирмадик" деган видеоларни ижтимоий тармоқларга жойлаганди. Шунингдек, "UFC 316" олдидан О'мэлли билан бирга жакузида кўриниш берганди ва айни гапларни айтганди.

Бу сафар Мераб Пётр Янга жакузи ҳазилини қилиб, уни жакузи партисига таклиф қилди. Россиялик эса унга рад жавобини берди ва "сенинг жакузингда менга жой йўқ, зотан у ерда зиёдаси билан эркаклар бор" деб айтиб ўтди. Мераб эса "эркак ҳам, аёл ҳам бўлади", деган жавобига Ян "сени ҳеч қачон аёллар билан кўрмадим" деб ҳазилини "ўзига едирди". Шу он Мераб дудуқланиб қолди ва кулиб юборди. Шундай қилиб, жанг олди матбуот анжумани ғолиби Пётр Ян бўлди. Маълумот ўрнида шуни айтиб ўтиш жоиз, спортчилар кардиосини мустаҳкамлаш учун, сувда машғулот олиб боришади. Двалишвили UFC даги кардиоси мустаҳкам бўлган энг яхши жангчи cаналади.

Александр Пантожа эса рақибининг июнь ойида икки ҳафта ичида Брендон Ройвалга қарши жангни олиб, қандай уришганини, ҳозир эса тўлиқ машғулот лагеридан келаётганига урғу бериб, Ваннинг не қадар иқтидорли жангчи эканини айтиб ўтди. Ван эса жангни учинчи раундгача тугатишини, UFC даги энг ёш иккинчи чемпионга айланишини (энг ёши Жон Жонс 23 ёшда бўлган) таъкидлади ва ХХI асрда туғилган илк чемпионга айланишини иддао қилди.

Тацура Тайра Брендон Моренони финиш қилишини ва Кёжи Хоригучидан ўтиб япон мухлисларнинг энг севимли жангчисига айланиб олиш нияти борлигини айтди. Брендон Моренога нафақат у, балки Генри Сеҳудо ҳам гап отди. Сеҳудонинг бу оқшом Телботга қарши сўнгги жангига чиқиши кутиляпти, лекин у UFC га фақат битта жангчи учун қайтиши мумкинлиги, у эса мексикалик жангчи эканини ифода этди. Брендон Морено эса бунга жиддий қарамаётганини, камар учун жанг қилишни истаётганини хабар берди.

Ҳамюртимиз Богдан Гуськов қотил либосларда ташриф буюриб, барчанинг эътиборини тортди ва нокаут қилмоқчи эканига ишора қилди. Блахович эса рақибидан 10 йил тажрибаси кўпроқ эканини ва шу боис ғалабага эриша олиши мумкингини тилга олди. 

Барча гаплар айтилди, энди ҳаммаси октагонда ҳал бўлади! UFC оламидаги энг сўнгги янгиликларни "Sports.uz" сайтида кузатиб боринг. 

Азизбек ҒОЗИЙ тайёрлади