Гвардиола Абдуқодирнинг қайси кучли томонларини санаб ўтди?

Абдуқодир Ҳусанов Англия Премьер-лигасидаги илк ўзбек футболчиси сифатида номини тарихга ёзиб бўлди. 20 ёшли ҳимоячининг “Манчестер Сити”га ўтиши ўзбек футболидаги энг катта воқеалардан бири сифатида эътироф этилмоқда.

“Манчестер Сити”га бирор янги футболчи бош мураббий Хосеп Гвардиоланинг розилигисиз олинмайди. Испаниялик мутахассис эса, ўйинчи олишда таваккал қилмайди, номзоднинг салоҳиятини таҳлил қилганидан кейингина жамоасига қўшади.

Англия чемпионлари – “Манчестер Сити”нинг расмий  mancity.com сайтида журналист Жек Мамфорд Хосеп Гвардиоланинг Абдуқодир Ҳусанов ҳақидаги фикрлари келтирилган мақолани эълон қилди.

Sports.uz портали таҳририяти ижодкорлари испаниялик мураббийнинг легионеримиз ҳақидаги қарашларини ўзбекистонлик футбол ишқибозлари эътиборига ҳавола этади.

- Қишки  трансферлар ойнаси даврида “Манчестер Сити”га “Ланс” ҳимоячиси Абдуқодир Ҳусанов, унинг “Палмейрас”даги ҳамкасби Витор Рейс ва “Айнтрахт” ҳужумчиси Умар Мармуш кўчиб ўтди.

Хосеп Гвардиола бу трансферларга изоҳ берар экан, Абдуқодир Ҳусанов анчадан бери клуб кузатувида бўлганини таъкидлади. Бош мураббий клубнинг спорт директори Чики Бегиристайн бу футболчини олишни илк бор ўтган ёзда таклиф қилганини айтди.

Гвардиоланинг ўзи ҳам жамоа ҳимоя чизиғи вакилларининг жароҳатлари ва муаммолари бу трансферни қишда амалга оширишни тақозо этганини тан олди, - деб ёзди Жек Мамфорд.

Журналистга кўра, Хосеп Гвардиола Ҳусановнинг салоҳиятига юқори баҳо берар экан шундай деган:

“Биз Чики ва унинг ходимлари билан мавсум бошидан бери учрашиб, барча позицияларга янги ўйинчиларни олиш масаласини муҳокама қилиб келамиз. Улар доим Ҳусанов ҳақида гапирарди. Жон Стоунз, Натан Аке, Рубен Диас ва Мануэль Аканжи билан юзага келган вазият бизни трансфер бозорига киришга мажбур қилди.

Мутахассислар Абдуқодир Ҳусанов кейинги бир неча йил давомида жамоада ўйнайдиган истиқболли футболчи эканини таъкидламоқда. Дарҳақиқат, биз янги ижрочиларни бир йилга олмаймиз. Улар бу ерда узоқ қолади.

Абдуқодир Ҳусановда бизга етишмаётган ноёб сифатлар бор, шунинг учун ҳам айнан уни танладик. Мен унинг жамоага ёрдам бера олишига аминман.

Ҳусанов ёш ва ҳали кўп нарсани ўрганади. Лекин ҳақиқий сабоқни ёзда, мавсумлар оралиғидаги тайёргарлик жараёнида бошлаймиз.

Абдуқодир биз учун ўта муҳим ўйинчи. У ҳимоя марказида, ўнг қанотда, уч ҳимоячи ва тўрт ҳимоячили тактикада ўйнай олади. Турли позицияларда ишончли ҳаракат қилади.

Ҳусанов тўпни назорат қила оладиган жановар ва бақувват ўйинчи. Унинг яна бир ўзига хос жиҳати тезлигидир”.

Жек Мамфорднинг таъкидлашича, Хосеп Гвардиола шогирдларининг ҳимояланиш, тезкорлик ва тўпни эгаллаб туришда муаммолар борлигини эътироф этиб, Абдуқодир Ҳусанов рақибнинг қарши ҳужумларини қайтаришда, жамоанинг  тўпни ўзида ушлаб, назорат қилиб туришда, рақибнинг хавфли ҳужумчиларини тўхтатиб қолишда самарали ўйнашига ишонмоқда.

Эслатиб ўтамиз, Абдуқодир Ҳусанов “шаҳарликлар” билан 4,5 йиллик шартнома тузган. Томонлар ўзаро келишувга кўра, ҳамкорликни яна бир йилга узайтириши мумкин. Ўзбек футболчиси Англия чемпионлари сафида 45-рақамда тўп тепади.

“Ливерпуль” афсонаси Ҳусанов трансферига қандай баҳо берди?

Шомуродов якшанба куни бошқа клубга ўтиши кутилмоқда. Жамоа номи маълум!

Ҳусановнинг трансфери ўзбек футболчилари учун Европага йўл очадими?

Гвардиола Ҳусановга энг катта талабни қўйди! Уни тез бажариш керак...

Ҳусановни нега икки баравар кўп пул бериб бўлса ҳам олиб келмадинг!