Ҳусановни нега икки баравар кўп пул бериб бўлса ҳам олиб келмадинг!

Абдуқодир Ҳусанов умумий 50 миллион евро эвазига “Ланс”дан “Манчестер Сити”га ўтганидан кейин бу трансфер кўплаб муҳокамаларга сабаб бўлмоқда.

Хусусан, Россия футболи экспертлари мамлакатдаги клублар спорт директорлари, селекционерлари, мутахассисларини ўзбек футболчисининг иқтидорини ўз вақтида пайқай олмагани учун маломат қиляпти.

Мисол тариқасида, Россия футбол уюшмаси фахрий президенти Вячеслав Колосковнинг фикрини келтириш мумкин.

- ЦСКА скаутлари истеъдод бобида Абдуқодир Ҳусановдан кам бўлмаган Аббосбек Файзуллаевнинг салоҳиятини кўра олди-ку. Балки Файзуллаев Ҳусановга нисбатан ўзини ёрқинроқ кўрсата олгандир.

Россия клублари селекционерлари нега Ҳусановни пайқай олмади? Буни мен муҳокама қила олмайман.

Мен унинг трансфери ҳақида ўқиганимда дарров: “Бизнинг селекционерлар қаерда эди?”, деган савол туғилди. Абдуқодир Ўзбекистон ва Беларусда ўйнаган, демак кўз ўнгимизда эди. Мудраб қолганмиз. Бу бизнинг спорт менежерларимиз обрўсини оширмайди, - деди Вячеслав Колосков.

ЦСКАнинг собиқ футболчиси Андрей Мовсесьян “армиячилар” клубида 12 йил давомида трансферларга масъул бўлган. Бу мутахассис Абдуқодир Ҳусанов Беларусь чемпионатида “Энергетик-БГУ”да ўйнаб юрганида унга эътибор қаратганини, лекин Минск шаҳри клубига мурожаат қилганида, “Ланс” раҳбарияти трансфер билан шуғулланаётгани ҳақида айтишганини маълум қилди.

Таниқли футбол агенти Дмитрий Селюк Андрей Мовсесьянни бу фикрлари учун кескин танқид қилди ва нотўғри йўл тутганликда айблади.

- Яқинда ЦСКА собиқ спорт директори Андрей Мовсесьяннинг интервьюсига кўзим тушди. У ЦСКА Абдуқодир Ҳусановга қизиқиш билдирганини, бироқ “Ланс” улардан аввал “Энергетик-БГУ” билан музокара бошлаганини айтган.

Дарров савол бераман: “Андрюша, бу гапларни нега энди айтяпсан? Бу билан зўр марказий ҳимоячини кўздан қочирмаганингни исботламоқчимисан?

“Ланс” Ҳусанов учун 100 минг евро тўлаган. Нега ЦСКА бу ўйинчини 200 минг евро тўлаб олиб келмади? Мана айнан шу омил биздаги спорт менежерларининг даражасини кўрсатади, - деди Дмитрий Селюк.

Қизиғи шундаки, Дмитрий Селюкнинг ўзи ҳам Абдуқодир Ҳусановнинг трансфери амалга ошишидан аввал ўзбек футболчисини “Манчестер Сити” тикаётган 50 миллион еврога арзимаслигини бонг урган эди.

- Мен Абдуқодир Ҳусановни анчадан бери биламан. У Беларусь чемпионатида “Энергетик-БГУ”да ўйнаган даврда менинг футболчим билан бир хонадонда яшаган. Ўзини кўрсата олди ва “Ланс”ни қизиқтириб қўйди.

Мослашув давридан кейин бу жамоада иқтидорини намойиш қилди ва ёзишларича, уни сўраб “Манчестер Сити” келибди.

Мени оммавий ахборот воситалари келтираётган сумма ҳайрон қолдирди. 50 миллион евро эмиш? Нималар деяпсизлар? Мен бунга ишонмайман! Бу қанақадир ўйин. Агар 15 миллион деганларингда ишонсам бўларди. Максимум 20 миллион евро бўлиши мумкин. 40 миллион ва қандайдир бонуслар ҳақида ёзишяпти. Бунақа рақамлар билан фақат халқни қўрқитасизлар.

Тўғри, “Манчестер Сити”да пул кўп. Балки бунақа харажат қила олар. Билмадим. Лекин 50 миллион евро ҳақида гапириш ортиқча. Энди сизлар марказий ҳимоячи учун бунақа катта пул берадиган кўплар клубларни биларсизлар, лекин мен бунга ишонмайман.

Ҳой, бир эътибор қилинглар, “Рома” ёзда Артём Довбикни  “Жирона”дан 30 миллион еврога олди. Сизлар 50 миллион евро ҳақида гапиряпсизлар ахир, - деб гапирганди.

Амалда эса, Англиянинг амалдаги чемпиони “Манчестер Сити” 20 ёшли ўзбекистонлик марказий ярим ҳимоячи учун жами 50 миллион евро сарфлади. Шуни айтишса керак, “зар қадрини заргар билади”, деб!

Гвардиола Ҳусанов қачон дебют қилишини айтди!

Шомуродов жамоасида охирги имкон қолди!

Ҳусановнинг Гвардиолани ҳайратга солган учта сифати айтилди!

Ҳусановнинг трансфери ўзбек футболчилари учун Европага йўл очадими?