Гвардиола келажакда терма жамоа бошқариши мумкин

Собиқ “Манчестер Сити” бош мураббийи Пеп Гвардиола келажакда миллий терма жамоалардан бирини бошқариши мумкин.

Каталониялик мутахассис “шаҳарликлар”даги 10 йиллик фаолиятини якунлади. Бу вақт ичида у жамоа билан 20 та соврин ютиб олди. Энди Гвардиола "City Football Group" элчиси сифатида ишлайди. Холдинг таркибига “Манчестер Сити” ва яна 10 та клуб киради.

"talkSPORT" маълумотига кўра, Пеп бир куни Англия терма жамоасини бошқаришни орзу қилади. Шу билан бирга, Саудия Арабистони футбол федерацияси ҳам 55 ёшли мураббийни терма жамоага олиб келишни истамоқда.

Журналист Бен Жейкобснинг айтишича, Саудия Гвардиолани 2034 йилги Жаҳон чемпионати учун узоқ муддатли лойиҳа сифатида кўрмоқда ва уни ҳозир дарҳол таклиф қила олмаса ҳам, кейинчалик бу ҳаракатни давом эттириши мумкин.

Шунингдек, у Англия учун ҳам Пеп идеал вариант бўлиб қолишини таъкидлади. Ҳозирча Томас Тухель билан шартнома узайтирилган бўлса-да, келажакда вазият ўзгарса, англияликлар ҳам яна Гвардиолага мурожаат қилиши мумкин.

“Менимча, Пеп бир куни албатта миллий терма жамоада ишлайди. Унинг ҳозирча бошқа режалари йўқ. Шунингдек, унинг Премьер-лигада бошқа клубни бошқариши эҳтимоли жуда паст”, — деди Бен Жейкобс.