Гвардиола қайси жамоалардан чўчиётганини аниқ айтди

“Манчестер Сити” бош мураббийи Хосеп Гвардиола олдида ўта масъулиятли вазифа турибди. Испаниялик мутахассис қўл остида “шаҳарликлар” кетма-кет тўрт маротаба Англия чемпионлигини қўлга киритган ягона жамоага айланди.

Манчестерлик фанатлар бу гал жамоа бешинчи бор Премьер-лига ғолиблигига эришиб, ўз рекордини янгилашини кутмоқда.

Сўнгги икки мавсум давомида “Сити”га асосан Гвардиоланинг шогирди Микель Артета бошқараётган “Арсенал” асосий рақобатчи бўлиб келмоқда. Хосеп Гвардиола чемпионлик йўлида бу гал рақобатчилар кўпроқ ва қудратлироқ эканини таъкидлади.

- Бу мавсум “Ньюкасл” икки йил аввалги даражасида ўйнайди. “Арсенал” ва “Ливерпуль”нинг қудрати ҳақида ортиқча гапириш шарт эмас.

Курашга “Манчестер Юнайтед” ҳам қўшилди. “Тоттенхэм” ёш ўйинчилари ва билимдон мураббийга эга, уларнинг салоҳиятига ишонаман. “Челси” таркибидаги бунча футболчи билан чемпионликка даъвогарлик қилади, бу жамоанинг мураббийи ҳам кучли, - деди Хосеп Гвардиола.