Гвардиола захирада ўтирган Ҳусанов ва бошқа 3 марказий ҳимоячига муносабат билдирди

Клублар ўртасидаги Жаҳон чемпионатининг сўнгги турида Хосеп Гвардиола бошчилигидаги "Манчестер Сити" "Ювентус" билан тўқнаш келиб, йирик 5:2 ҳисобида муваффақиятга эришди. 
 
Ушбу беллашув якунлангандан сўнг ташкил этилган матбуот анжуманида Гвардиола бугунги учрашувдаги 2 марказий ҳимоячи ва захирадаги фулбеклар ҳақида ҳам ўз фикрлари билан ўртоқлашди. 
 
"Бугун бизда иккита ажойиб марказий ҳимоячи бўлди ва яна тўрттаси захирада ўтирган эди. Ўтган йили эса бизда фақатгина 1 та захира ҳимоячимиз бўлди. Шунинг учун биз қийналдик, машқ қила олмадик. Энди эса мураббийлар штаби билан ўз машғулотимизни ривожлантирдик. Бу — Англия Премьер-лигаси, Европа ва барча мусобақаларда курашиб, каттароқ натижалар қайд этиш учун ягона йўлдир" - дея таъриф бериб ўтди испаниялик мутахассис. 
 
Эслатиб ўтамиз, "шаҳарликлар" Жаҳон чемпионатининг гуруҳ босқичини 1-ўрин билан якунлаб, кейинги босқичга йўл олди. Плей-оффда эса "H" гуруҳидан 2-ўрин билан чиққан Саудиянинг "Ал-Ҳилол" клуби билан тўқнаш келади.