Гвардиолага сўраганидан икки баробар кам маош таклиф қилишди

Хосеп Гвардиола ва Италия футбол федерацияси ҳозирча шартнома борасида умумий нуқтага ета олмаяпти. Италия оммавий ахборот воситалари ёзишича, испаниялик мутахассис миллий жамоани қабул қилиб олиш бўйича FIGCнинг қатъий саъй-ҳаракатларидан мамнун, аммо молиявий масалада томонлар ўртасида катта фарқ бор.

La Gazzetta dello Sport нашри маълумотларига кўра, Пеп Гвардиола йиллик маош сифатида 20 миллион евро сўраяпти. Италия футбол федерацияси эса ҳозирча бу миқдорнинг ярмига яқин таклиф берган, холос. Шу боис музокаралар секин кечмоқда ва келишув яқин орада эълон қилиниши кутилмаяпти.

Гвардиола сўнгги ўн йил давомида «Манчестер Сити»ни бошқариб келди. Унинг қўл остида «шаҳарликлар» бир қатор ички чемпионатлар ва халқаро мусобақаларда юқори натижаларга эришди. Энди эса мутахассис клуб футболидаги узоқ йиллик фаолиятидан сўнг миллий жамоани қабул қилиши мумкинлиги муҳокама қилинмоқда.

Италия терма жамоаси учун Гвардиоланинг номзоди жуда муҳим деб қаралмоқда. Чунки «скуадра адзурра» яқинда катта мағлубиятга учради: жамоа жаҳон чемпионатига йўлланма ололмади. Италия плей-офф финалида Босния ва Герцеговинага мағлуб бўлиб, мундиалга чиқиш имконини қўлдан бой берди.

Бу омадсизликдан сўнг терма жамоа бош мураббийи Дженнаро Гаттузо истеъфога чиқди. Ҳозир FIGC янги бош мураббий қидирмоқда ва асосий номзод сифатида айнан Хосеп Гвардиола кўриб чиқилаётгани айтилмоқда. Аммо музокараларнинг асосий тўсиғи – маош ва шартнома шартлари бўлиб турибди.