Ҳакими “Реал”га ўтиш учун қўлидан келган барча ишни қилишга тайёр

Франциянинг ПСЖ клуби ҳимоячиси Ашраф Ҳакими Мадриднинг "Реал" клубига ўтиш ниятида. Бу ҳақда журналист Рамон Алварес де Мон Х ижтимоий тармоғида маълум қилди.

Манбага кўра, 27 ёшли марокашлик ўнг қанот ҳимоячиси яқинларига Мадрид клуби билан шартнома имзолаш учун қўлидан келган барча ишни қилишга тайёрлигини билдирган. Ҳакими болалигидан "Реал"га мухлислик қилади ва ПСЖ билан амалдаги узоқ муддатли шартномасига қарамай, қадрдон клубига қайтишни истайди. Ҳакими Мадрид клуби тизимида 2015 йилдан 2018 йилгача фаолият юритган.

Ҳимоячининг бошқа жамоага ўтиши учун яна бир сабаб бор - унинг энг яқин дўсти Килиан Мбаппе бир неча бор ҳимоячи билан бирга ўйнаш истагини билдирган. Шу балан бирга, ПСЖ Ҳакимини сотишни режалаштирмаяпти, аммо агар футболчи кетишни талаб қилса, клуб унинг трансферини кўриб чиқиши мумкин.

Хакими 2021 йилда ПСЖ билан шартнома имзолаб, Миланнинг "Интер" клубидан 68 миллион евро эвазига ўтган эди. Жорий мавсумда ҳимоячи парижликлар сафида 24 та ўйинда майдонга тушиб, 3 та гол урди ва 7 та голли узатмани амалга оширди. Унинг клуб балан шартномаси 2029 йилгача мўлжалланган бўлиб, "Трансфермаркт" портали баҳосига кўра, унинг трансфер нархи 80 млн еврони ташкил қилади.