"Ҳали ҳеч нима йўқотилгани йўқ" ёхуд Виктор Кумиков ваъда берди...

“Андижон” клубининг турнир жадвалидаги бугунги ҳолати жуда хавотирли. Клуб 16 та ўйинда бор-йўғи 9 очко олди холос. Таассуфки, жамоа намойиш этаётган ўйин ҳам шунга ярашадек туюляпти. Бунга “Сурхон” ҳамда “Бунёдкор”га қарши учрашувлар мисол бўла олади.

Биринчи даврадаги хато ва камчиликлардан қанчалик хулоса чиқарилди, деган савол туғиляпти. Бу борада мураббийлар ўзгартирилгани билан изоҳлаш мумкин. Ўйинлар бошланишига оз фурсат қолганида жамоада ўтган йили ишлаб кетган Виктор Кумиков қайтарилди. Лекин таркиб-чи? Уч нафар легионерни ҳисобга олмаганда, асосан ёшларни тилга олиш мумкин. Ғалабалар ўта зарур бўлган бир паллада “Андижон” ҳамон очко йўқотяпти. Ҳозирча Кумиков бошчилигида тўртта ўйинда иккитадан дуранг ва мағлубият қайд этилди.

Қизиғи шундаки, россиялик мутахассис ўтган йили жамоани бошқарган маҳалида 10 та ўйиннинг тенг ярмида дуранг билан мағлубият кузатилган. Шундай экан, Кумиков “Андижон” билан қачон ғалаба қозонаркин? Лекин бир жиҳатни ҳам унутмаслик керак, мураббий клубни кеч қабул қилиб олди. Тажрибасига шубҳа йўқ. Фақат таркибда ўзи истаган даражада ўзгаришлар қилишга деярли вақти ҳам қолмаганди. Футболда эса ҳаммасидан ҳам натижа муҳим саналади.

- Виктор Балютович, охирги пайтларда “Андижон”ни таниб бўлмай қолди. Клубга нима бўляпти?

- Ҳаммаси жойида. Машғулотларда шуғулланяпмиз, қўлдан келганча ишлаяпмиз. Бахтга қарши учрашувларда кутилган натижаларни қайд этишда сира омадимиз чопмаяпти. Қолаверса, таркибга келиб қўшилган янги ўйинчилар ҳали жамоага тўла киришиб кетганларича йўқ. Бунинг учун албатта бироз вақт керак бўлади. Аста-секинлик билан ҳаммаси ўз жойига тушиб боряпти. Гарчи натижалар кишини қувонтирадиган даражада бўлмаса-да, машғулотлардаги бир-бирларини ўзаро тушуниш динамикаси анча яхшиланиб бормоқда. “Бунёдкор”га қарши кечган беллашувда қандайдир икки-уч дақиқа ҳаммасини ҳал қилди. Ваҳоланки, ўйинни яхши ўтказаётгандик. Беллашувнинг қолган қисмида эса йигитларимиз эътирозга сабаб бўладиган ўйин намойиш этмаётгандилар. Албатта, ҳаммасининг чаппасига ўзгариб кетиши футболчиларимизнинг руҳиятига таъсирини кўрсатмасдан қолмади. Ўйлайманки, руҳий ўрадан чиқиб оладиган бўлсак, ҳаммаси изига тушиб кетади.

- “Андижон” сизнинг бошқарувингиз остида тўрт ўйинда икки дуранг ва икки мағлубият қайд этди. Ўтган йили бошчилигингизда беш дуранг ва шунча мағлубият кузатилганди. Нима деб ўйлайсиз, тарих такрорланяптимикин?..

- Ҳозирча иккита дуранг ва иккита мағлубият қайд этдик. Агар икки бор ғалаба қозона оладиган бўлсак, ҳаммаси изига тушиб кетса керак. Шунда барчаси мутаносиб кўриниш олади. Ҳали ҳеч нарса йўқотилгани йўқ. Вазиятни яхши томонга ўзгартириш учун эса ҳали вақт бор.

- Жамоадаги муаммолар орасида қайси бири ҳаммасидан кўра кўпроқ сизни безовта қиляпти?

- Жамоадаги муаммолар аста-секинлик билан ечимини топиб боряпти. Бундай муаммоларнинг аксарият қисми футболга алоқадор эмаслигини айтиб ўтмоғим даркор. Футболга тааллуқли бўлган муаммога келсак, ўйинчиларимиз орасида бир-бирини тўлиқ тушуниш бизга етишмаяпти. Шунинг эвазига баҳсларда пала-партиш ҳаракатлар кўзга ташланмоқда. Ваҳоланки, биз мураббийлар улардан аксини кутамиз. Ўйлайманки, бу асосий муаммони албатта ечамиз. Қолаверса, чемпионатда бироз танаффус бўлиши ҳам бизга қўл келиши турган гап. Шунда майдонда ўзаро тушуниб тўп суришни ҳам йўлга қўйиш мумкин бўлади. Шундай бўлишига ишоняпман.

- Четдан назар ташлаганда, Суперлига иштирокчилари орасида “Андижон” ҳаммадан кўра бўш футбол намойиш этмоқда. Бундай фикрларга қўшиласизми?

- Юқорида жамоадаги ҳолат ва биз мураббийлар штаби қайси жиҳатлар устида ишлашимиз ҳақида тўхталиб ўтдим. Назаримда, шу гаплар ушбу саволингизга жавоб бўлса керак. Тўғри, ўйинларда натижаларимиз кўнгилдагидек бўлмаяпти. Бутун ўйин борасида ёмон кўриняпмиз, дея олмайман. Бироқ муҳим паллаларда нимадир ўхшамай қоляпти. Бунинг сабаби футболчилар бир-бирларини энг муҳим вазиятларда тушунмай қолишаётганидадир. Агар учрашувларни кузатиб борган бўлсангиз, бир қанча ҳолатларда беллашувларни ғалаба билан якунлашимиз мумкиндек таассурот қолдира бошлагандик. Аммо, юқорида айтганимдек, муҳим-муҳим вазиятларда ўйин тизгинини қўлдан бой беряпмиз. Шу нарса бизга панд бериб қўймоқда. Биз мураббийлар албатта бундан кейин шундай ҳолатлар такрорланмаслиги учун ишлаймиз. Шунинг учун ҳам бу мавсум лигада қолишимиз мумкинлигига ишоняпман.

- Клубда сиздан ташқари штабингизда Корниенко, Усмонов, Олимжонов, Раҳмонов, Абдуқодиров, Раҳматуллаев ишлашмоқда. Қизиқ, штабда шунча мураббийлар қандай иш билан шуғулланишяпти?

- Мураббийлар штабида ишлаётганлар орасида ёшлар анча. Ҳозирча улар ўрганишмоқда. Ўз навбатида бундай малака ошириш келажакда ёш мутахассисларга асқотади, деб ҳисоблайман. Улардан фарқли ўлароқ, анча тажрибали бўлган мураббийларимиз эса зиммаларига юклатилган муайян вазифаларни бажаришяпти. Яна такрорлайман, штабимиздаги ёшлар ҳозирда келажак учун аста-секинлик билан тажрибаларини ошириб бориш билан машғуллар. Буни тўғри тушунишингизни сўраган бўлардим.

- Бундай ёш мураббийлар билан ишлаш сизга халақит бермаяптими?

- Ҳаммаси жойида. Ҳеч қандай муаммо юзага келмаяпти. Йигитлар умумий ишимизга халақит бермаган ҳолда ўрганишда давом этмоқдалар. Мен бунда бирор-бир хавотирли нарсани кўрмаяпман.

- Уларни айнан сиз таклиф қилдингизми ёки раҳбарлар шундай тўхтамга келишдими?

- Биз раҳбарият билан аввал бошиданоқ штабимизда ёшлар ҳам бўлиши масаласи юзасидан келишиб олганмиз. Улар келажак учун тажриба оширишади. Мен бунга музокара чоғидаёқ дарҳол розилик берганман. Ўртамизда ҳеч қандай муаммо йўқ. Ҳаммаси жойида.

- Виктор Балютович, “Андижон”га яна қайтиш борасидаги қарорни қабул қилганингизда хатога йўл қўйдиммикан, деган фикр хаёлингиздан ўтяптими?

- Мен қайтишга қарор қилиб хатога йўл қўйдимми?..Бир нарса дейишим қийин, ҳаммасини вақт кўрсатади. Ҳозирча хаёлимга сиз айтган фикр келганича йўқ. Чунки бутун диққат-эътиборимни зиммамга юклатилган вазифани бажаришга қаратганман. Ҳаммасини вақт кўрсатади. Мавсум ниҳоясига етганидан кейингина бу масала юзасидан хулоса чиқариш мумкин бўлади. Ҳозир эса йўқ, бундай деб ўйламаяпман.

- Охирги савол: “Андижон”нинг Суперлигада қолиши мумкинлигини кафолатлай оласизми?

- Албатта, ахир мен бу ерга шунинг учун ҳам келганман-ку! Бош мураббий сифатида ўз ишимни имкон қадар яхши бажаришга ваъда бераман. Клубнинг Суперлигада қолиши учун бор тажриба ва билимимни ишга соламан. Агар ўз куч ва билимимга ишонмаган тақдиримда бу ерга келмаган бўлардим. Албатта, айтилган гапни амалда бажариш билан иккисининг ўртасида фарқ бўлади. Нима бўлган тақдирда ҳам биз кучлилар сафида жон сақлаб қолиш учун охиригача курашишга тайёрмиз.