Ҳамиджон Актамов: "Қизилқум" бугун ютгани билан бу "Турон"нинг мағлубияти эмас..."

Бугун Суперлига доирасида бўлиб ўтган “Турон” – “Қизилқум” (0:1) жамоалари ўртасидаги учрашувдан кейин меҳмонлар бош мураббийи Ҳамиджон Актамов ўз фикрларини билдирди.

- Бугунги учрашув тўғрисида нима дея оласиз?

- Авваламбор, бугунги улуғ айём кун билан барча юртдошларимизни табриклайман. Шундай муборак кунда мухлисларимизни қувонтирганимиздан хурсандмиз. Жуда қизиқарли ўйин бўлди. Анчадан бери бундай мухлислар билан тўлган стадионда ўйнамагандик.

Ўйин юқори темпда ўтди. Бугун ким гол урса, ўша жамоа ютарди. Биринчи бўлимда ҳам вазиятлар яратгандик. Танаффусдан кейин ҳам имкониятларимиз кўпроқ бўлди. Биринчи бўлимда ўйинимиз унчалик қовушмади, иккинчи бўлимда ўйинни назорат қилдик. Тўпни ўзимизда ушладик. Футболчиларимизга раҳмат айтаман. Стадионга шунча мухлис келгани “Турон”нинг эмас, балки Ўзбекистоннинг ютуғи деб ўйлайман. “Қизилқум” бугун ютган бўлса ҳам бу “Турон”нинг мағлубияти эмас. Асосан ўзбек футболининг ютуғи деб айтмоқчиман. Нимага деганда, стадионда мухлислар кўпайди. Буни кўриб хурсанд бўлдик. Кечадан бери “Турон” клуби томонидан қилинаётган ишларни кўриб хурсанд бўлдик. Футболга мана шундай эътибор бўлаётгани албатта қувонарли. Барча шароитлар яратилган. Биринчи йил Суперлигада қатнашаётган бўлса ҳам жамоа ҳомийларига раҳмат айтаман. Ўзбекистонда шароити тўлиқ таъминланган саноқли клубларимиз бор. “Турон” шуларнинг ичига кириб улгурибди. Келажакда бу жамоага омад тилайман.

- “Қизилқум”ни қачон халқаро майдонларда кўришимиз мумкин?

- Худо хоҳласа, шу йили ушбу мақсадимизга эришишга ҳаракат қиламиз. Бунинг устида ишлаяпмиз. Чемпионат яқинда бошланган. Олтита ўйин ўйнадик, битта учрашув кам ўтказганмиз. Ҳаммаси олдинда. Кўзлаган мақсадимизга эришамиз деб умид қиламиз.

- “Турон” кейинги ўйинларда ғалаба қозона оладими?

- Бу – футбол. Мана, ўзимиз ҳам биринчи турда ютгандик. Шундан бери дуранг, дуранг, мағлубият ва яна дуранг...бугун эса ғалаба. “Турон” жамоасида ёш ўйинчилар кўп экан, легионерлари ҳам яхши. Ўйиндан-ўйинга ҳаммаси мослашиб бораверади.