Ҳақиқатан зўр экан! Моуриньо “Реал”да фақат бир ҳимоячига тан берди

Мадриднинг “Реал” клуби марказий ҳимоячиси Дин Хёйсен жамоанинг янги бош мураббийи Жозе Моуриньода катта таассурот қолдирди.

Diario AS хабарига кўра, Испания терма жамоасининг 2026 йилги жаҳон чемпионати қайдномасига киритилмагани 21 ёшли футболчини қаттиқ ранжитган ва янада кучлироқ меҳнат қилишга ундаган.

Марказий ҳимоячи таътил пайтида ҳам астойдил машғулот ўтказган ва мавсумолди йиғини бошланишида жисмоний тайёргарлиги билан Моуриньони ҳайратда қолдирган.

Футболчининг ўзи ҳам “Реал”даги илк мавсумини яхши ўтказмаганини яхши тушунади ва шу сабабли португалиялик мутахассис қўл остида ўзини исботлашга қаттиқ иштиёқ билдирмоқда.

Дин Хёйсен ўтган йили Англиянинг “Борнмут” клубидан “Реал”га кўчиб ўтган эди. Унинг мадридликлар билан шартномаси 2030 йилгача амал қилади.