Ҳарорати баланд ўйинлар остонасидамиз ёхуд Суперлигада супер тўқнашув

23-26 май кунлари Суперлигада 11-тур ўйинлари бўлиб ўтади. Доимгидек, бўлажак турда бир-биридан муросасиз ва муҳим баҳслар кутмоқда.

23 май

19:00. “Андижон” – “Сурхон”

Суперлиганинг 11-тури “Бобур арена”дан бошланади. Мағлубиятлар сериясига нуқта қўйиш ҳаракатида юрган “Андижон” Термизнинг “Сурхон” жамоасини қабул қилади. Шу йилнинг апрель ойида бу клублар Ўзбекистон Кубоги гуруҳ босқичида тўқнашишган ва унда термизликлар 2:3 ҳисобида устун келган. “Андижон”нинг янги бош мураббийи Максим Шацких дебют учрашувида Ғузорда “Шўртан”га ягона гол эвазига ютқазди. Навбатдагиси эса Максимнинг иккинчи ўйини ва “Бобур арена”даги илк учрашувига айланади. “Андижон” янги мураббий бошчилигида ўзгариб бормоқда ва бу ҳолат “Сурхон” билан баҳсда кўзга ташланса ажаб эмас.

20:00. “Насаф” – ОКМК

Турнинг марказий беллашуви. Яқинда ушбу жамоалар Ўзбекистон Кубоги гуруҳ босқичида Олмалиқда куч синашишди. Ўшанда ОКМК 0:2 ҳисобидаги мағлубиятни учрашув охиригача 3:2 ҳисобидаги ғалабага айлантира олди. Олмалиқликлар 23 очко билан пешқадам бўлиб турган бўлса, “Насаф” 22 очко билан иккинчи ўринда. Ҳозирча Рўзиқул Бердиев жамоаси чемпионатда мағлубиятга учраётгани йўқ. Бироқ юқорида айтганимиздек, ОКМК кубокда рақибини енгга олди. Қаршидаги беллашувда эса “Насаф” ўша мағлубиият учун реванш олиш ҳаракатида бўлади. Ҳар томонлама ўйиннинг ҳарорати баланд бўлади. Балки голларга бой ўйин кўрармиз.

24 май

19:00. “Нефтчи” – “Шўртан”

Фаворит сўзсиз “Нефтчи”. “Шўртан” охирги турларга келиб очколарни қўлга киритяпти. Жиззахда дуранг ўйнади, уйида “Андижон”ни енгди. Эътиборлиси, бош мураббий Анвар Бердиев кетгач, жамоа ўйини ва натижаси ижобий тарафга ўзгарди. Барибир “Шўртан” ҳамон аутсайдер бўлиб турибди. “Нефтчи” уйида ҳатто дуранг ўйнаса ҳам бу улар учун мағлубиятга тенг бўлади. “Шўртан” яна сюрприз кўрсатишга қодирми?

21:00. “Сўғдиёна” – “Бухоро”

Улуғбек Бақоев яна бир бор собиқ жамоаси “Сўғдиёна”га қарши туради. Унинг жамоаси “Бухоро”нинг натижалари қониқарли эмас. Анчадан бери ғалаба нашидасини сурмаяпти. Устига-устак “Сўғдиёна”да ҳам вазият оғир. Жамоалар мос равишда 13 ва 14-поғоналарда. Барибир “Бухоро” иккинчи рақам остида қарши ҳужумда имкониятини кутиб ўйнаса керак.

25 май

18:45. “Навбаҳор” – “Қўқон-1912”

Бу турда водий дербиси бор. Ўтган турда “Навбаҳор” Тошкентда “Бунёдкор”ни 2:3 ҳисобида мағлубиятга учратди. Қўқонликлар эса чемпионатда сўнгги иккита турда имкониятни бой берди. Намангандаги учрашувда темп юқори даражада бўлса керак. “Қўқон-1912” бунгача “Андижон” ва “Нефтчи”га қарши ўтган водий дербиларида дуранг ўйнади. Кўрамиз, бу сафар нима бўларкин?

20:00. “Пахтакор” – “Хоразм”

“Пахтакор” Камолиддин Тожиев бошқарувига ўтганидан кейин рақиблар дарвозасига кўпроқ голлар уряпти ва ғалабаларга эришяпти. Навбатдаги турда ҳам “Пахтакор” фаворит. “Шерлар” ўзига келяпти ва йўлидан чиққан ҳар бир рақибини аяб ўтирмаяпти. “Хоразм” рақибларига очиқ ва ҳужумкор ўйин кўрсатишини биламиз. Уларнинг тактикаси “Пахтакор”га қарши баҳсда қанчалик иш бераркин? “Шерлар”га қарши қизиқарли учрашув кўришимиз турган гап.

21:00. “Динамо” – “Қизилқум”

Вадим Абрамов жамоаси мағлубият нималигини билмай келяпти. Бу сафар уларни “Қизилқум”га қарши ўйин кутмоқда. “Динамо” ўйин ва натижаси бўйича бежизга кучли учталикда эмас. “Қизилқум”га ҳозирча ўзи кутганчалик барқарорлик етишмаятпи. “Динамо” ўз уйида ўйнаётгани учун мезбонларда имконият кўпроқ. Қолганини ўйинда кўрамиз.

26 май

20:00. “Машъал” – “Бунёдкор”

“Машъал” – “Бунёдкор” ўйини орқали Суперлигада 11-тур ниҳоясига етади. Асрор Алиқулов устозлик қилаётган “Машъал” “Бунёдкор”ни енгиш учун уриниб кўради. Тан олиш керак, “Бунёдкор” бу йил яхши таассурот қолдиряпти. Фақат охирги пайтларда чемпионат ва кубокда ютқазиб қўйди. “Бунёдкор”нинг ўйини инқирозга тушиб қоляптими ёки бу тасодифми? Буни “Машъал”га қарши баҳсда кўрамиз.