Ҳасанбой Латибохунов:"Миразизбек Мирзахалиловни тан оламанми ёки йўқ, у 57 кгда жаҳоннинг биринчи рақамли боксчиси"

Яқиндагина бокс бўйича Ўзбекистон чемпионати ўз якунига етди. Ушбу турнирда 57 кг вазн тоифасида ҳам жиддий рақобат кечди. Айниқса, ярим финал баҳсида чемпион Миразизбек Мирзахалиловга имкониятни бой бериб қўйган, Ҳасанбой Латибохуновнинг ҳаракатлари ҳам мухлисларда яхши таассурот қолдирди.

Жорий йилги чемпионатда бронза медалини қўлга киритган ушбу чармқўлқоп устаси билан боғланиб, унга фаолияти ва якунига етган Ўзбекистон чемпионати ҳақида бир нечта савол билан мурожаат қилдик...

- Аввало, Ўзбекистон чемпионатида совриндорлар қаторидан жой олганлигингиз билан табриклаймиз!

- Катта раҳмат.

- Дастлабки саволимиз анъанавий тус олади. Яъни, боксга кириб келишингиз тарихи ҳақида сўзлаб берсангиз?

- Боксга кириб келишим Жасур акам билан боғлиқ. Унинг машғулотларига дадам билан бирга томоша қилишга борардик. Шундан қизиқишим ортиб, 3-синфда мен ҳам машғулот ўтказаман, деб бокс залига борганман.

- Жасурбек Латиповми?

- Албатта.

- У билан қандай қариндошчилик жойингиз борлиги мухлислар учун қизиқ бўлса, керак?

- Амакимнинг ўғли бўлади. Амаким барвақт бу дунёдан ўтиб кетганлиги туфайли, Жасур акамни ҳам дадам тарбия қилганлар.

- Адашмасам, ҳар иккингиз расмий мусобақада тўқнаш келгансиз ва бу жангда Жасур Латипов сизга имконият берганди, янглишмадимми?

- Тўғри, 2016 йил Бекободда бўлиб ўтган Ўзбекистон чемпионатида иккимиз финалга етиб келганмиз. Табиийки, унда 52 кг вазн тоифасида иштирок этардим. Ўшанда чемпион бўлсам, олийгоҳга кириш учун лицензияни қўлга киритардим. Шунинг учун бу жанг бўлмаганди.

- Агар, ўша жанг бўлганда Жасурбекка қаршилик қила олардим, деб ўйлайсизми?

- Менга лицензия керак бўлмаган тақдирда имкониятни акамга берардим. Демоқчиманки, акамга қарши жанг қилмасдим.

- Келинг, шу ўринда фаолиятингиз мобайнида қандай натижалар қайд этганлигингизга тўхталсак?

- Ёшлар ўртасида икки марта ва катталар ўртасида бир бора Ўзбекистон чемпиони бўлганман. Халқаро турнирлар ғолиби ва совриндори бўлишга ҳам эришганман. Токио Олимпиадасидан кейин вазн тоифамда биринчи рақамли бўлиш учун ҳаракат қилмоқдаман.

- Унга қадар вазнда муаммолар бўлмайдими, 57 кгни назарда тутяпсизми?

- Албатта, табиий вазним 58-59 кгни ташкил қилади. Муаммолар бўлмайди.

- Токиодан кейин биринчи рақамли бўлмоқчиман деяпсиз... Демак, Миразизбек Мирзахалилов айни кунда бу вазннинг ҳақиқий етакчиси эканлигини тан оласиз?

- Тан оламанми ёки йўқ, у 57 кгда жаҳоннинг биринчи рақамли боксчиси ва амалдаги жаҳон чемпиони, Олимпиадага ҳам йўлланмани қўлга киритган. Шундай экан, Токиода барча вакилларимизга чин кўнгилдан мухлислик қиламан.

- 57 кг вазн тоифасида биринчи рақамли бўлиш йўлида сизга Миразизбекдан бошқа яна кимлар рақобат туғдириши мумкин?

- Ўзбекистонда ҳар бир вазнда жиддий рақобат мавжуд. Мирзахалиловдан ташқари Ойбек Жўраев ва Хуршидбек Расулжоновни айтиб ўтишим мумкин.

- Миразизбек билан бўлган жанг борасидаги фикрингиз қандай?

- Ютишим ҳам мумкин эди. Бироқ олти ой жароҳатда бўлдим. Ушбу мусобақага 1.5 ой тайёргарлик кўра олдим холос.

- Биринчи ва иккинчи раунднинг ярмига қадар яхши ҳаракат қилдингиз. Лекин учинчи раундда тўла ташаббусни бериб қўйдингиз. Бу нима билан боғлиқ бўлди?

- Юқорида таъкидлаб ўтганимдек, жисмоний тайёргарлик панд бериб қўйди.

- Эҳтимол, жиддий зарба ўтказиб юборгандирсиз, шахсан мен учинчи раундда жигарингиздан салмоқли зарбани қабул қилганингизни гувоҳи бўлдим ва айнан шундан кейин сизда сустлашиш юзага келди?

- Балки, шу ҳам сабаб бўлгандир. Аслида, жуда кўп зарбалар йўллади. Лекин аксарияти ҳимояга тегди.

- Демак, натижадан норози эмассиз?

- Ушбу жангда мен яққол устунлик қилмасам, имкониятим камлигини ҳис қилардим. Бу жангда қандай савиядаги боксчи эканимни исботлашга ҳаракат қилдим ва қайсидир маънода буни уддаладим, деб ўйлайман.

- Жасурбек билан спарринг тушиб турасизми?

- Йўқ. 2016 йил терма жамоада эканлигимизда бирга ишлаганмиз. Ундан кейин мен вазнимни ўзгартирдим.

- Ҳар иккингизнинг ҳам илк мураббийингиз битта инсон бўлса, керак?

- Ҳа, Абдулҳафиз Эгамов қўл остида бокснинг сир-асрорларини ўрганганмиз. Ҳозирда, Андижон олимпия заҳиралари коллежида Марс Қўчқоров, Александр Размахов, Абдувоҳид Жалолов ва Сардор Раззоқов қўл остида машғулотлар олиб боряпман.

- Режаларингиздан келиб чиқсак, ҳали профессионал боксга ўтиш ниятингиз йўқ...?

- Ҳозирча йўқ. Ҳаваскорда ўз ўрнимга эга бўлиб, кейинчалик профида ҳам ўзимни синаб кўраман.

- Ўзбекистон чемпионатига ҳозирлик кўриш жараёнида сизга спарринг рақиблар ҳам ёрдам берганлиги аниқ...

- Ҳа, Ҳасанбой Дўсматов ва Салим Шамсиддинов яқиндан кўмаклашди. Ўз ўрнида, уларга миннатдорлик билдириб қоламан.

- Суҳбат учун вақт ажратганингиздан миннатдормиз ва келажакдаги фаолиятингизга омад ёр бўлишини тилаб қоламиз!

- Раҳмат. Имкон қадар, юртимиз шарафини халқаро турнирларда муносиб ҳимоя қилишга ҳаракат қиламиз!