Ҳайдалган мураббий 8 миллион фунт олиб кетади

Яқинда “Тоттенхэм” бош мураббийлигидан истеъфога чиқарилган даниялик мутахассис Томас Франкка тўланадиган компенсация суммаси маълум қилинди.

Лондон клуби ҳамкорликни муддатидан олдин тўхтатгани учун Томас Франкка 8 миллион фунт стерлинг тўлайдиган бўлди.

Қизиғи шундаки, “Тоттенхэм” ўтган ёзда Томас Франк ва унинг уч нафар ёрдамчисини “Брентфорд”дан олиб келиш учун 10 миллион фунт стерлинг сарфлаган эди. Бу танлов ўзини оқламади. Таркиб кучли эканига қарамай, “Тоттенхэм” хавфли ҳудудга яқин поғонага тушиб қолган.

Daily Mail нашри Даниядаги манбаларига таяниб хабар беришича, Франкка тўланган компенсация 2028 йилгача мўлжалланган шартнома бўйича бир йиллик маошига тенг бўлган.

“Тоттенхэм” Франкка ойига тахминан 650 минг фунт тўлар эди, демак ишдан бўшатиш компенсацияси тахминан 8 миллион фунтни ташкил этган.

Агар бу мутахассисни ишга жалб қилиш, маош ва ишдан бўшатиш харажатлари қўшиб ҳисобланса, Франкнинг саккиз ойлик фаолияти “Тоттенхэм”га жами 23 миллион фунтга тушгани маълум бўлади.