"Ҳаёт осон эмас, акс ҳолда дунёга келибоқ йиғламаган бўлардик" - Роналдунинг сиз эшитган ёки эшитмаган энг сара иборалари

Криштиану Роналду нафақат аъло даражадаги футболчи, балки биргина жумла билан ё завқ туғёнини ёки ғазаб тўлқинини келтириб чиқаришга қодир ажойиб спикердир.

Португалия терма жамоаси сардори ОАВ билан мулоқот чоғида имкон қадар эҳтиёткорроқ бўлишга интилади. Бироқ унинг айрим фикрлари ўзининг кескинлиги билан ишқибозлар томонидан эслаб қолинган.

Қуйида Роналдунинг турли даврларда берган интервьюларида келтириб ўтган ёрқин, оқилона ва фалсафий иқтибослари саралаб олинган.

ҲАЁТ ҲАҚИДА

«Ҳаёт – осон нарса эмас. Акс ҳолда биз дунёга келибоқ йиғламаган бўлардик».

ЎЗ МАҲОРАТИ ТЎҒРИСИДА

«Машғулотларда алдамчи ҳаракатларни жуда кўп амалга оширардим. Буни деярли ҳеч ким такрорлай олмасди. Бир сафар Пол Скоулзга қўлимдан нималар келишини кўрсатдим. У буларни кузатди ва кейин шундай деди: «50 метр узоқликдаги анави дарахтни кўряпсанми? Биринчи уринишадёқ тўпни унга теккизаман». Қисқа югуриш, зарба ва тўп аниқ нишонга тегди. Шундан сўнг, у мендан худди шуни такрорлашни сўради. 10 мартача такрорлашга уриндим – бироқ ҳар сафар тўпни нишонга теккиза олмадим. Шундан кейин Скоулз фақатгина кулиб қўйди ва ҳеч нима демасдан кийим алмаштириш хонасига кириб кетди».

ХАРАКТЕРИ ХУСУСИДА

«Мен болалигимдан портловчи характерга эгаман. Бир сафар мактабда талаффузим устидан кулгани учун ўқитувчини стул билан урганман».

МЕССИ ҲАҚИДА

«Нега энди мен Мессига ҳасад қилишим керак? Мен – Роналдуман ва ўзим хоҳлаган барча нарсани юта оламан, бошқаларнинг ҳатто тушига кирмаган кўплаб совринларни қўлга кирита оламан».

ЖАҲОННИНГ ЭНГ ЯХШИ ЎЙИНЧИСИ ТЎҒРИСИДА

«Сиз Мессини энг зўр, деб ҳисоблайсизми? Аммо бошқалар энг зўрни, айтайлик Иньестанинг тимсолида кўриши мумкин. Ҳар ким мустақил танлаш ҳуқуқига эга – бунга барчанинг ҳуқуқи бор. Аммо мен учун сайёрадаги энг зўр футболчи Криштиану Роналду бўлган ва шундай бўлиб қолади».

ЎЗИНИНГ ТРАНСФЕР ҚИЙМАТИ ХУСУСИДА

«Сайёрамизнинг энг қимматбаҳо ўйинчиси эканлигимни англаш, менга жуда ёқмоқда».

ХЕЙТЕРЛАР (ЁМОН КЎРУВЧИЛАР) ҲАҚИДА

«Нега менинг манзилимга ҳуштакбозлик қилишади? Ўзингиз ўйлаб кўринг: мен бойман, чиройлиман ва машҳурман. Мен – буюк ўйинчиман. Улар шунчаки ҳасад қилишади, мен бошқа сабабни кўрмаяпман».

ДИД ТЎҒРИСИДА

«Ҳатто Исо Масиҳ ҳам барчага хуш келмаган бир пайтда Роналду ҳақида нима дейиш мумкин».

ОРЗУСИ ХУСУСИДА

«Орзум - сон-саноқсиз голлар киритиш. Ҳатто бу рақамларнинг қандай номланишини ҳам билмай».

ИШИ ҲАҚИДА

«Агар футболда фаолиятимни бошлай олмаганимда ким бўлган бўлардим? Хм... Эҳтимол, официант ёки бармен бўлиб ишлаётган бўлардим».