Ҳужумчи трансфер рад этилганидан кейин машғулотдан кетиб қолди

«Вулверхэмптон» клуби форварди Толу Арокодаре жамоа машғулотини ярим йўлда тарк этди. BBC хабарига кўра, футболчининг бундай қарори унга «Фиорентина»га ўтишга рухсат берилмагани билан боғлиқ.

Нашр маълумотича, Нигерия терма жамоаси ҳужумчиси айнан Италиянинг «Фиорентина» клубига ўтишни қатъий талаб қилган. Бироқ «Вулверхэмптон» раҳбарияти бошқа йўлни танлаб, Туркиянинг «Трабзонспор» жамоасидан тушган таклифни қабул қилган.

Шундан сўнг Арокодаре норозилик сифатида машғулот пайтида майдон ўртасига ўтириб олган ва уни Италия клубига қўйиб юборишни талаб қилгани айтилмоқда.

Эслатиб ўтамиз, ўтган мавсумда Толу Арокодаре «Вулверхэмптон» сафида барча мусобақалар доирасида 38 та ўйин ўтказиб, 6 та гол урди ва 2 та голли пас берди. Жамоа эса 2025/2026 йилги мавсум якунига кўра Англия Премьер-лигасини тарк этиб, Чемпионшип дивизионига тушиб кетган эди.