Ҳусанов энг яхши харидлардан бири! "Арсенал"нинг собиқ футболчиси ҳимоячини мақтади

Ҳамюртимиз Абдуқодир Ҳусанов "Ланс"ни тарк этиб, январь ойидаги трансферлар ойнасида 34 миллион фунт эвазига "Манчестер Сити"га ўтди. Гвардиола уни тўғридан-тўғри катта баҳсларда майдонга туширди.

Футболчимиз дунёнинг энг кучли жамоаларига қарши бир қатор яхши ўйинлар намойиш этди. Ҳусанов "Бернабеу"даги 3:1 ҳисобидаги мағлубиятда Винисиусга қарши муваффақиятли ҳаракат қилди. Бундан сўнг эса, "Ливерпуль"га қарши ишончли ўйин кўрсатди.

"Wrighty’s House" подкастида англиялик собиқ футболчи Иан Райт Ҳусановни мақтади.

- Ҳусановнинг биринчи ўйини, дебютини кузатдим. Адашмасам, у машғулотларда атиги бир-икки кун бўлганди.

Биласизми, у тилни ҳам, бошқа ҳеч нарсани ҳам билмасди. Шубҳасиз, бу ҳар кимнинг энг ёмон тушида кўрадиган дебютларидан бири эди. Шунинг учун ўшандан бери унга меҳр қўйиб, қўллаб-қувватлаб келяпман.

Менда унинг мазкур ҳаракатларини тўғри қабул қилдим. Сабаби, янги жамоага кўчиб ўтганингизда сизда ҳаяжон бўлади. Менда ҳам бундай ҳолат бўлган. "Арсенал"га борганимни эслайман, тош қотгандим.

У Винисиусга қарши жуда яхши ўйнади. Менимча, Ҳусанов трансфери "Сити"нинг энг яхши харидларидан бирига айланади.