Ҳусанов “Манчестер Сити”да ўзгариш ясади

Ўзбекистон миллий терма жамоаси аъзоси Абдуқодир Ҳусанов “Манчестер Сити” футболчи ҳисоблангани боис sports.uz портали ушбу клубга оид маълумотларни ўзбекистонлик футбол ишқибозлари эътиборига ҳавола қилишни давом эттиради.

“Манчестер Сити” ўтган мавсумнинг биринчи ярмида юз берган инқироздан кейин таркибни қайта шакллантиришга қарор қилган эди. Хосеп Гвардиола талаб қилган авлодлар алмашинуви 20 январда жамоага Абдуқодир Ҳусановнинг олиб келиниши билан бошланди.

Экспертларнинг таъкидлашича, иккита трансферлар ойнасидан кейин “Манчестер Сити”нинг асосий таркибида ўйнаётган футболчиларнинг умумий ўртача ёши қарийб икки ёшга пасайгани кузатилмоқда.

Бир йил муқаддам Хосеп Гвардиола қўл остидаги жамоа ёши 26,9 ни кўрсатган бўлса, ҳозир бу кўрсаткич 25,1 ёшга тушди.

Бунга кўп жиҳатдан Кевин де Брюйне, Эдерсон, Илкай Гюнжоған ва Мануэль Аканжи каби ёши 30 дан ошган футболчиларнинг кетиши таъсир ўтказди. Қолаверса, клуб спорт директори лавозимини Чики Бегиристайндан қабул қилиб олган Уго Виана олдига таркибни ёшартириш вазифаси ҳам қўйилганини айтиш лозим.

Жорий мавсумда Хосеп Гвардиола жамоасида мунтазам ўйин амалиётига эга бўлаётган ўйинчилар орасида энг ёши Нико О’Райлидир. Клуб тарбияланувчиси 2005 йили туғилган. Абдуқодир Ҳусанов, Рико Льюис, Савиньо эса, Никодан бир ёш катта холос.

Ҳужумкор футболчилардан Оскар Бобб ва Райан Шерки ҳам ёш авлод вакиллари ҳисобланиб, улар 2003 йилда туғилган.

Ҳозирги таркибда мунтазам майдонга тушаётган футболчилар орасида энг ёши катталари 1994 йилда туғилган Жон Стоунз, Бернарду Силва ва улардан бир ёш кичик Натан Акедир.

Холанд Месси, Роналду ва бошқа супертўпурарларни “уялтириб” қўйди

“Манчестер Сити” тўпурари Эрлинг Холанд Норвегия терма жамоасида ҳам ҳақиқий қаҳрамонга айланиб бормоқда.

Норвегияликлар 2026 йилги жаҳон чемпионатининг минтақавий саралаш турнири доирасида Исроил миллий терма жамоасини қабул қилиб, рақиб дарвозасига жавобсиз бешта тўп киритди.

Гарчи Эрлинг Холанд олтинчи дақиқада пенальтини амалга ошира олмаган бўлса-да, учрашув давомида учта гол уриб, хет-трикка эришди. Яна иккита голни исроиллик футболчилар ўз дарвозасига киритиб қўйди.

Хет-трик Холанд номини жаҳон футболига ёзди. 25 ёшли Эрлинг халқаро миқёсда энг тез 50 та тўп киритган футболчига айланди. Норвегиялик форвард бу маррага эришиш учун атиги 46 та учрашувда майдонга тушишига тўғри келди.

Жами Норвегия терма жамоаси учун урган голлари сонини 51 тага етказган Холанд машҳур ҳужумчилардан анча илдам эканини намойиш қилди.

Opta тадқиқот марказининг маълум қилишича, аввалги рекордчи Неймар Бразилия  терма жамоасида 50 та гол уриш учун 74 та ўйин ўтказишига тўғри келган. Бу кўрсаткични франциялик Килиан Мбаппе  ва польшалик Роберт Левандовски 90 тадан, аргентиналик Лионель Месси 107 ва португалиялик Криштиану Роналду 114 та учрашувда забт этган.

Ўзбекистон ва Уругвай учрашуви ҳисоби олдиндан айтилди

Ўзбекистонга қарши саф тортадиган Уругвай нимаси билан кучли?

Ҳусанов машҳур футболчининг мундиалга йўлини тўсиб қўйди