Ҳусанов ўрнига Умар!
Абдуқодир Ҳусанов учун ҳам якунланган мавсум том маънода тарихий аҳамият касб этди.
Беларусь чемпионатидан Европанинг “топ-5” лигаларидан бирига кўчиб ўтган ҳамюртимиз катта ўсишга эришди.
20 ёшли марказий ҳимоячи ўзи учун янги учта мусобақа – Франция чемпионати, Европа Чемпионлар лигаси ва Европа Лигасида дебют учрашувларини ўтказди.
Истеъдодли ҳимоячимиз Франция чемппионати ҳамда УЕФА таснифидаги икки нуфузли мусобақада жами 15 маротаба майдонга тушиб, 959 дақиқа тўп тепди.
Абдуқодир Ҳусановнинг олдида турган энг катта вазифа “Ланс”нинг бошланғич таркибига кириб олишдан ибораь. Франк Хейз бошчилигидаги мураббийлар штаби ҳамюртимиз асосан бонланғич таркиб ҳимоячиларининг ўринбосари сифатида фойдаланди.
Ҳусанов мавсум давомида Дейвер Мачадо, Факундо Медина, Жонатан Градит ва Кевин Дансо каби асосий ҳимоя тўртлигидан бирортаси ўйинда иштирок эта олмай қолган тақдирда майдонга туширилди.
“Ланс” ўйинларини кузатган экспертлар ўзбек футболчисини жамоанинг асосий марказий ҳимоячиси Кевин Дансога муносиб ўринбосар бўлишини таъкидлаб келмоқда.
Клуб раҳбарияти ёзда австриялик ҳимоячини қимматроқ сотиб юбориш орқали, бюджетни барқарорлаштиришга қарор қилган. Бу масала ёзда яна кўтарилади ва лансликлар Кевин Дансо бўйича таклифларни кутмоқда.
Сўнгги маълумотларга қараганда, клуб раҳбарияти Кевин Дансонинг ўрнини Абдуқодир Ҳусановга тўлиқ бермоқчи эмас. Улар бу позицияга ўзлари анчадан бери кузатиб юрган марказий ҳимоячи – Умар Солетни олиш ҳаракатларини бошлади. “Ланс” нишонида турган ўйинчи Австрия чемпионатида “Зальцбург” шарафини ҳимоя қиляпти.
24 ёшли Умар тўрт йил муқаддам “Лион”дан “Зальцбург”га йўл олганди ва шу пайтга қадар Австрия чемпионатида анча пишди. Бўйи икки метрга яқин баҳайбат ҳимоячи бир неча позицияда ўйнай олади.
“Ланс” фаолиятини ёритиб келаётган le11hdf.fr сайтининг ёзишича, Франк Хейз ўтган ёздаёқ Умарни жамоага олиб келишга уринганди. Ўшанда “Зальцбург” французларнинг 13 миллион евро ва қўшимчасига 2 миллион евро бонус кўринишидаги таклифини қабул қилмаган. Лансликлар бу ёз яна Умар Солетга жиддий тарзда харидор бўлмоқда.
Агар бу трансфер амалга ошса, Абдуқодир Ҳусанов келаси мавсумда ҳам бошланғич таркибга кириш учун жиддий рақобатга дуч келиши айтилмоқда.
Фикрлар