Ҳусанов "Реал"га қарши асосий таркибда майдонга тушиши мумкинми?

Яқин соатлар ичида "Манчестер Сити" Чемпионлар лигаси доирасида "Реал"га қарши ўйнайди. Ушбу учрашув учун "City Xtra" ўзининг тахминий таркибини тузиб чиқди. 

"Манчестер Сити" шанба куни "Сандерленд"ни мағлуб қилиб, 3 очкони қўлга киритди. "Реал" эса Ла Лига доирасида "Сельта"га мағлуб бўлди. "Қаймоқранглилар" учун Англия клубига қарши ўйин муҳим ҳисобланади. Айниқса, Хаби Алонсонинг келажагига таъсир қилиши мумкин бўлган ўйинлардан бири бўлиши мумкин. 

Дарвозада катта эҳтимол билан Жанлужжи Доннарума туриши кутилмоқда. Ёзда "шаҳарликлар" таркибига келиб қўшилган итальян Хосеп Гвардиола учун биринчи рақамли посбонга айланиб улгурди. 

"City Xtrа"нинг ёзишича, ўнг қанот ҳимояда бугун сўнгги учрашувларда майдонга тушаётган Матеуш Нунеш ҳаракат қилади. Гарчи Абдуқодир Ҳусановнинг тезлиги ва агрессияси бўлса-да, португалиялик майдонда кўпроқ ҳаракат қилаётгани ва спорт формаси яхшироқ бўлганлиги сабабли у асосий таркибда тушиши эҳтимоллиги катта. 

Марказий ҳимоя учун Рубен Диаш ва Йошко Гвардиол варианти кўрилмоқда. Шунингдек, чап қанотда Нико Ўрайли ҳаракат қилиши кутиляпти. 

Ярим ҳимоя марказида Бернарду Силва ва Нико Гонсалес биргаликда ҳаракат қилиши таҳмин қилиняпти. Сўнгги ўйинлардаги ҳаракатларидан келиб чиқиб, ажойиб мавсум ўтказаётган Фил Фоденнинг асосий таркибдаги жойи нақд бўлган. 

Ўнг қанот вингери сифатида бугун "Реал" футболчиларига етарлича муаммо туғдира олиши кутилаётган Райан Шерки ҳаракат қилади. Чап қанотда эса тезкорлиги ва дриблинглари билан бу мавсум кўпчиликни ҳайратга солаётган Жереми Доку ўйнайди ва марказий ҳужумчи сифатида Эрлинг Холанд майдонга тушади. 

Тахминий таркиб: Доннарума, Нунеш, Диаш, Гвардиол, Ўрайли, Силва, Гонсалес, Фоден, Доку, Шерки ва Холанд.