Ҳусановга зўр янгилик!

Янги йилда “Манчестер Сити”га кўчиб ўтган Абдуқодир Ҳусанов  фаолияти нафақат ўзбекистонлик, балки бир неча мамлакатдаги футбол ишқибозлари диққат марказида турибди.

20 ёшли ҳимояччимиз Англиянинг амалдаги чемпионлари сафига қўшилган кундан беш кун ўтиб, жаҳон фуболидаги энг мураккаб мусобақа – Премьер-лигасида дебютини ўтказишга муваффақ бўлди.

Гарчи “Манчестер Сити”даги илк учрашувини “Челси”га қарши ўтказган ҳамюртимиз ўйиннинг дастлабки беш дақиқасида бир неча бор хатога йўл қўйган бўлса-да, бу ҳолат экспертлар, мураббийлар, футболчилар томонидан одатий вазият сифатида баҳоланди.

Абдуқодирни бош мураббий Хосеп Гвардиола, “Манчестер Сити”нинг Эрлинг Холанд, Мануэль Аканжи, Йошко Гвардиол каби юлдузлари, кўплаб футбол мутахассислари, ҳатто бир қатор мамлакатларнинг футбол жамоатчилиги ҳам қўллаб-қувватлади.

Энди Ҳусанов яна бир нуфузли мусобақа – Европа Чемпионлар лигасининг плей-офф босқичида иштирок этиши мумкин.

“Манчестер Сити” футболчилари қитъанинг энг нуфузли мусобақа умумий босқичида охирги учрашувда Бельгиянинг “Брюгге” жамоасини 3:1 ҳисобида енгди. Бу ғалаба “шаҳарликлар”га нимчорак финал йўлланмаси учун ўтиш ўйинида қатнашиш ҳуқуқини берди.

Абдуқодир Ҳусанов Чемпионлар лигасининг умумий босқичи учун УЕФА қайдномасидан ўтказилмагани учун жамоасининг ҳозиргача бўлган халқаро ўйинларига жалб этилмади.

Хосеп Гваридиоланинг ўзи жамоага январда қўшилган янги ўйинчилар – Абдуқодир Ҳусанов, Умар Мармуш ва Витор Рейс Европа Чемпионлар лигасининг кейинги босқичларида нафақат муҳим эканини айтиб ўтди.

- Албатта, янги ўйинчилар жуда муҳим. Биз бутун мавсум давомида футболчилар етишмовчилигидан қаттиқ қийналдик. Янги ўйинчилар  билан бизда вариантлар кўп бўлади. Умид қиламанки, Доку ҳам қайтади, - деди Хосеп Гвардиола.

Таъкидлаш жоизки, Абдуқодир Ҳусанов УЕФА томонидан ўтказилаётган энг нуфузли мусобақаларда дебютини нишонлаб бўлган. 20 ёшли марказий ҳимоячимиз “Ланс”да ўйнаган бир ярим йил давомида Чемпионлар лигаси, Европа Лигаси ва Конференциялар лигаси доирасида ўтказилган беллашувларда майдонга тушган эди.

“Манчестер Сити” янги форматда ўтказилаётган Европа Чемпионлар лигасининг умумий босқичини 22-ўринда якунлаганини инобатга олиб, мутахассислар плей-оффнинг ўтиш ўйинида “Реал” ёки “Бавария”га тўқнаш келишини маълум қилишди.

Демак, Абдуқодир Ҳусановнинг “Манчестер Сити” ўйинчиси сифатида Европа чемпионлар лигасидаги дебютини ҳам кутиб қоламиз...

Шомуродов жамоа танлади, фақат...

Ўзбек футболчилари Бразилия жамоаси билан ўйнайди!