Ҳусановнинг “Манчестер Сити”даги вазифаси айтилди
Абдуқодир Ҳусановнинг “Ланс”дан “Манчестер Сити”га трансфери хорижда ҳам жуда кўп муҳокама қилинмоқда.
Очиғини айтганда, Англиянинг амалдаги чемпион жамоаси 20 ёшли ўзбек футболчисига 40+10 кўринишида жами 50 миллион евро тўлашга розилик бергани кўпчилик учун кутилмаган ҳолат бўлди.
Ҳатто легионеримизни Европага танитган “Ланс” мутасаддилари ҳам ўз кашфиётини 25-30 миллион евро атрофида баҳолаётган эди. Амалда лансликлар 100 минг еврога олинган футболчи трансферидан тўрт юз баравардан кўпроқ даромад қилди.
Ўзбек футболчисининг Англия Премьер-лигасига кўчиб ўтишига муносабат билдирганлар орасида россиялик футбол агенти Дмитрий Селюк ҳам бор.
Sports.uz портали ушбу мутахассиснинг фикр-мулоҳазаларини ўзбекистонлик футбол ишқибозлари эътиборига ҳавола қилади.
- Абдуқодир Ҳусанов “Манчестер Сити”да ўйнаб кета оладими? Бу саволга жавоб беришда унинг энг зўр ва қадрли сифати – меҳнаткашлигини тилга олиш керак. Ўзбек футболчиси ўз устида кўп ишлайди, яккакурашларда зўр, тезлиги анчагина баланд.
“Манчестер Сити” бош мураббийи Хосеп Гвардиоланинг марказий ҳимоячиларга ўз талаблари борлигини таъкидлаш лозим.
Испаниялик мутахассис қўл остида ҳимоя марказидан ўрин олган ўйинчилар юқорига кўтарилиб ўйнаши, аниқ паслар узатиши ва ҳужумларни бошлаб бериши талаб этилади. Айнан мана шу масалада Ҳусанов маълум даражада қийинчиликка дуч келиши мумкин.
Худо Абдуқодирнинг йўлини очсин! У яхши йигит ва жуда сифатли ҳимоячи, - деди Дмитрий Селюк.
Таъкидлаш жоизки, Абдуқодир Ҳусановнинг ўйин услубини таҳлил қилаётган экспертлар легионеримиз Англия Премьер-лигасига мос экани ҳақида ўз хулосаларини билдирмоқда. Ва бундан келиб чиқиб, Абдуқодир бўлажак жамоасида ўзига қўйиладиган вазифаларни уддалаш олишига умид билдирамиз.
Хусусан, таҳлиллар ва тадқиқотлар натижасига кўра, Абдуқодир Ҳусановнинг универсаллик, тезкорлик, узоқ масофаларга аниқ тўп узатиш орқали ҳужумларни бошлаб бериш қобилияти алоҳида эътироф этилган.
20 ёшли легионеримиз жуда баланд сакрайди ва мукаммал координацияга эга, ҳаракатларини тўғри бошқара олади. Абдуқодирнинг катта бошланғич тезлиги бор ва хусусияти орқали рақибнинг тезкор ҳужумчилари билан рақобатлашади.
Ҳусанов бош билан ишончли ўйнаш, юқоридан келаётган тўпларни қайтариш техникаларини пухта ўзлаштирган. У тўпни узоқ масофага аниқ етказиш, паслари орқали қарши ҳужум бошлаш, тўпни эгаллаб олиш, подкат ташлаш ва прессингга уста.
Ўзбекистонлик футболчининг яна бир асосий устун жиҳати ҳимоянинг турли схемаларига мос тушади, марказий ҳимоячи бўлишига қарамай, бошқа нуқталарда ҳам ишончли ўйнай олади, ўйинни яхши “ўқийди”, тактикани тўғри тушунади.
Ўзбекистон терма жамоасининг истеъдодли, кўп қиррали ва тезкор ҳимоячиси энди салоҳияти ва маҳоратини замонавий футбол ватани Англияда кўрсатишини кутиб қоламиз.
Фикрлар