Ибрагимович ЖЧ-2026 финалидаги мушлашув ҳақида: Парадесни омади бор экан, майдонда менга ўхшаган футболчи йўқ эди

Швеция терма жамоасининг собиқ футболчиси Златан Ибрагимович ЖЧ-2026 финалида содир бўлган можаро ва унга боғлиқ ҳолатлар юзасидан ўз фикрини билдирди. Қайд этиш керак, ҳал қилувчи баҳсда Аргентина Испанияга 0:1 ҳисобида мағлуб бўлган эди. Учрашув якунида майдонда Леандро Паредес иштирокида жанжал келиб чиққан.

Финалдан сўнг аргентиналик ярим ҳимоячи аввало Испания терма жамоаси ҳимоячиси Эрик Гарсиянинг бўйнидан қаттиқ ушлаб, унга нисбатан тажовузкор ҳаракат қилди. Кейин эса жамоадошини ҳимоя қилишга уринган ярим ҳимоячи Гавига ҳам жисмоний таъсир ўтказди. Бу ҳолат икки жамоа ўйинчилари ўртасидаги тортишувни кучайтирди.

«Паредес ўзини омадли деб ҳисоблаши мумкин, чунки майдонда мен каби ўйинчи йўқ эди. Агар ўша ерда бўлганимда, уни бошим билан уриб, қизил карточка олган бўлардим. Бу унинг томонидан мутлақо нопрофессионал хулқ-атвор», — дея таъкидлади Ибрагимович.

У шунингдек испаниялик футболчиларнинг реакциясидан ҳам норозилик билдирди: «Испания ўйинчилари нима қилаётганини тушунмайман. Улар шунчаки туриб, бошқа бир футболчи жамоадошини ураётганини томоша қилишдими?» — деди Златан Fox Sports эфирида.

Эслатиб ўтамиз, Испания терма жамоаси ўз тарихида иккинчи бор жаҳон чемпиони бўлди. Аргентина эса кумуш медаллар билан кифояланди. Жанубий Америка вакили шу пайтга қадар уч марта жаҳон чемпиони бўлган.