"Икки тарафлама келишган ҳолда шартномани бекор қилдик" - легионеримиз клубини ўзгартиряпти

Хабарингиз бўлса, бир қатор ўйинчиларимиз яна Малайзия чемпионатига йўл оляптилар. Чунки у ерларда бизнинг футболчиларимизга талаб ҳарқалай чакки эмас.

Ёдингизда бўлса, ўтган йили истеъдодли ярим ҳимоячи Сирожиддин Қўзиев Малайзиянинг “Кучинг Сити” клубига йўл олганди. Натижада у илк бор фаолиятида легионер сифатида тўп сура бошлади.

Сирожиддин аввало у ердаги фаолияти қандай ўтгани ҳақида гапирди.

“Нефтчи” жамоасидан кейин Малайзия чемпионатига йўл олгандим. У ердаги фаолиятимга тўхталадиган бўлсам, жуда яхши ўтди, деб айта олмайман. Ўртача даражада бўлди. Шу сабабли Малайзиядаги фаолиятимдан унчалик қониққаним йўқ. Жамоамиз турнир жадвалида пастки ўринлардан бири бўлгани ва қолган рақибларга қараганда бироз кучсизроқ эканлиги учун ҳам қийинроқ ўтди. Боз устига жамоам Малайзия Суперлигасида илк бор иштирок этди.

Биласизми, жамоамиз энди шаклланяпти, таркиби ҳам кўпроқ ёшлардан ташкил топган. Шунинг учун улар биринчи марта Малайзия Суперлигасида иштирок этишяпти. “Кучинг Сити” клубини ташкил топганига ҳам ҳали кўп вақт бўлгани йўқ. Босқичма-босқич шу даражага етиб келди”.

Қўзиев энди эркин агентга айланди. Ўзи билан мулоқот қилиш асносида жамоадан кетиши сабабли тўғрисида ҳам фикр билдириб ўтди.  

“Кучинг Сити” билан икки тарафлама келишган ҳолда шартномани бекор қилдик. Унинг амал қилиш муддати шу йилнинг декабрь ойигача эди. Жамоам билан хайрлашишда ҳеч кимдан хафагарчилик ёки келишмовчилик бўлмади. Раҳбарият, мураббийлар ва футболчилар билан ҳам илиқ тарзда хайрлашдим”.

Мухлислар учун эндиликда бу футболчининг қайси клубда тўп суриши қизиқ. Эшитишимизча, Сирожиддин собиқ жамоаси - “Машъал”да ҳам ўйнаши мумкин экан. Шу ростми? Жавобини ўзидан эшитамиз:

"Таклифлар билан агентим шуғулланяпти. Ҳозирча аниқ қарорга келганимиз йўқ. Балки яқин кунларда ҳаммаси ҳал бўлиб қолар. Кутиб турибмиз. Мен шунчаки “Машъал” жамоасида машғулотлар ўтказиб турибман. Бу фақат спорт формамни ушлаб туриш учун холос".

Унда футболчимиз яна легионерга айланмоқчими? Чунки ўзимизда трансфер ойнаси ёпилди...

"Худо хоҳласа, яна бошқа мамлакатга кетиш ниятим бор. Лекин ҳозир таъкидлаганимдек, бу масалада аниқ бир тўхтамга келмадик. Ўзбекистон чемпионатида трансфер ойнаси ёпилди. Ўзимизни Суперлигада қолмасам керак. Агентлар ишлашяпти. Иложи борича Суперлигамиз ўйинларини кузатиб боришга ҳаракат қиляпман. Кураш ва ўйинлар анча қизғин кечяпти”, - дейди Сирожиддин Қўзиев.

Шуҳратбек Жўраев.