Икром Алибоев яна Жанубий Кореяга қайтди. Унинг янги жамоаси номи маълум!

Ўтган мавсумни Жанубий Кореянинг К-лига 1 чемпионатида “Канвон” шарафини ҳимоя қилган ҳамюртимиз Икром Алибоев атрофида турли гап-сўзлар юганди. Боиси, “Канвон” билан хайрлашган легионеримизга бир қатор жиддий таклифлар бўлгани сир эмасди. Лекин якунда Алибоев яна Жанубий Кореяга қайтишга қарор қилди.

Sports.uz маълумотига кўра, “Сеонгнам” клуби футболчимизга жиддий таклиф билан чиқди. Натижада Икром куни кеча яна Жанубий Кореяга жўнаб кетди. Ушбу клуб К-лига 2 да иштирок этмоқда.

“Сеонгнам” Алибоевга икки йиллик шартнома таклиф қилди. Ёдингизда бўлса, мазкур жамоада ўз вақтида Жамшид Искандеров ҳам тўп сурган.

Алибоевга шунингдек, Фарғонанинг “Нефтчи” жамоаси ҳам жиддий қизиқиш билдирганди. Бундан ташқари, унга Саудия Арабистони чемпионатининг биринчи дивизионида иштирок этаётган “Ал-Жабалайн” ҳам Алибоевга кўз тикаётганди. Бу клуб элитага қайтиш учун курашмоқда. Лекин якунда Икром “Сеонгнам”ни танлади.