Илк бор ўтказилаётган "Беш ташаббус паралимпиадаси"га старт берилди!

Жорий йилнинг ноябрь-декабрь ойларида илк бор жисмоний имконияти чекланган ва ногиронлиги бўлган ёшлар ўртасида спортнинг пара енгил атлетика, пара стол тенниси, пара шахмат, пара шашка ва пара киберспорт турлари бўйича "Беш ташаббус паралимпиадаси” бўлиб ўтади.

Кеча Республика Олимпия ва Паралимпия спорт турларига тайёрлаш марказида "Беш ташаббус паралимпиадаси”нинг Тошкент шаҳар босқичига старт берилди. Иштирокчилар биринчи кунда пара енгил атлетика бўйича ўз омадларини синаб кўришди.

Таъкидлаш керакки, 19 ноябрга қадар Республикамизнинг барча ҳудудларида "Беш ташаббус паралимпиадаси"нинг вилоят босқич беллашувлари ўтказилади. Ғолиблар декабрь ойида пойтахтимизда бўлиб ўтадиган якуний Республика босқичида иштирок этиш ҳуқуқини қўлга киритади.

Эътиборлиси, айни кунгача ушбу мусобақаларда иштирок этиш истагини билдирган 18 минг нафардан ортиқ қатнашувчи махсус бот орқали ариза қолдирган. Бу эса "Беш ташаббус паралимпиадаси"га қизиқиш нақадар юқори экани ва баҳслар ҳар қачонгидан ҳам муросасиз кечишини англатади. Биз эса барча иштирокчиларга омад тилаймиз!