Инфантино: "Ҳақамларнинг баҳсли қарорлари ёки ғалати интизомий қарорлар дунёдаги энг йирик лигаларда одатий ҳол"

ФИФА президенти Жанни Инфантино якунланган Жаҳон чемпионати – 2026 давомида қабул қилинган баҳсли қарорлар юзасидан ўз фикрини билдирди.

Унинг таъкидлашича, мусобақа пайтида масъул органлар томонидан чиқарилган айрим қарорлардан норозилик табиий ҳолат ҳисобланади. Шу билан бирга, Инфантино жамоатчиликни расмий ҳужжатларга эътибор қаратишга чақирди.

«Айрим қарорлардан қониқмасликни тушуниш мумкин. Лекин, илтимос, расмий ҳужжатларга назар солинг – бу каби қарорлар дунёнинг энг нуфузли чемпионатларида ҳам одатий ҳол ҳисобланади.

Ҳакамларнинг “бахсли” қарорлари ёки интизомий жиҳатдан “тушунарсиз” деб баҳоланаётган ҳолатлар – масалан, эҳтимолий хатоли қизил ёки сариқ карточкалар, ёки айрим вазиятларда футболчиларни дисквалификация қилмаслик тўғрисидаги қарорлар – бу дунёдаги энг йирик лигаларда кенг тарқалган амалиётдир.

Қизиғи шундаки, худди шу амалиётни қўллаётган айрим мамлакатлар ўзиёқ бу усулни танқид қилади», – деди Жанни Инфантино.

Эслатиб ўтамиз, АҚШ терма жамоаси ҳужумчиси Фоларин Балогун Босния ва Герцеговинага қарши 1/16 финал баҳсида (2:0) олган қизил карточкаси ортидан дисквалификация қилинган эди. Аммо унга нисбатан жазо вақтинча тўхтатилгани сабабли, у Бельгияга қарши 1/8 финал учрашувида (1:4) майдонга тушиш имкониятига эга бўлди.

Маълум қилинишича, АҚШ президенти Дональд Трамп Балогуннинг майдондан четлатилиши масаласини Инфантино билан муҳокама қилганини тан олган.

Жаҳон чемпионати атрофидаги танқидларга тўхталар экан, Инфантино шундай деди: «Сиз нафрат тарқатиш билан банд бўлган пайтингизда, ФИФА дунёдаги энг яхши томошани уюштирди. Танқидга шунчалик берилиб кетдингизки, бутун қувончни қўлдан бой бердингиз. Бир оз тиниқинг, мулоҳаза қилинг, дуо қилинг».

У мусобақанинг умумий ташкилотига ҳам алоҳида тўхталиб ўтди: «Ҳеч қандай жиддий инцидентлар қайд этилмади, фақат хурсандчилик ҳукм сурди. Хавфсизлик 100 фоиз таъминланди. Эрон термаси АҚШга муаммосиз кириб келди. Виза масаласида айрим рад этишлар ҳақида гапирилди, аммо миллионлаб одамларга виза берилди», – дея қайд этди ФИФА президенти.