"Интер" ҳужумчисига АПЛнинг 2 гранд клуби жиддий қизиқмоқда

Франциялик ҳужумчи Маркус Тюрамнинг номи ёзги трансфер ойнасида яна шов-шувларга сабаб бўлмоқда. "Il Giorno" нашрига кўра, "Интер" футболчисига "Арсенал" ва "Манчестер Юнайтед" томонидан қизиқиш билдирилган. Ҳар икки клуб марказий ҳужумчи қидирмоқда.

Тюрам билан 2023 йилда қизиққан ПСЖ ҳам бу сафар яна ҳаракатга тушиши мумкин. Унинг "Интер" билан шартномасида 85 миллион еврога тенг тўлов шарти бор.

Миланликлар унинг эҳтимолий кетишига тайёрланаётган кўринади. Манбаларга кўра, клуб "Фиорентина" форварди Мойзе Кинни номзод сифатида кўриб чиқмоқда. Кин учун белгиланган 52 миллион евролик воз кечиш пули 15 июлгача амал қилади.

Агар шу муддатгача келишув амалга ошмаса, "Фиорентина"ни 25 гол урган ҳужумчини сотишга кўндириш анча қийин бўлади. Шунингдек, "канонирлар" ва "қизил иблислар" Кин билан ҳам алоқада экани хабар қилинган.

Маркус Тюрам ўтган мавсум А Серияда 32 ўйин ўтказиб, 14 та гол ва 4 та ассист билан иштирок этди.