Ираола "Ливерпуль" бош мураббийига айланди

"Ливерпуль" клуби Андони Ираолани жамоа бош мураббийи этиб тайинланганини расман эълон қилди.

43 ёшли испаниялик мутахассис ушбу лавозимда Арне Слот ўрнини эгаллади ва мерсисайдликлар билан шартнома имзолади.

Ираола 2023 йилдан буён "Борнмут"ни бошқариб келаётган эди. Унинг қўл остида жамоа АПЛда мос равишда 12, 9 ва 6-ўринларни эгаллади ҳамда тарихида илк бор еврокубоклар йўлланмасини қўлга киритди. Шунингдек, мураббий фаолияти давомида Кипрнинг АЕК, Испаниянинг "Мирандес" ва "Райо Вальекано" клубларини ҳам бошқарган.

Футболчилик фаолиятида Ираола асосан "Атлетик Бильбао" сафида тўп сурган. У 2003–2015 йиллар давомида басклар жамоасида ўйнаган, кейинчалик эса "Нью-Йорк Сити" шарафини ҳимоя қилган.

Маълумот учун, мерсисайдликлар 2025/26 йилги мавсумни совринсиз якунлади. Жамоа Англия Премьер-лигасида 5-ўринни эгаллаган бўлса-да, қўшимча йўлланма орқали Чемпионлар лигаси иштирокчисига айланган.