Исак жароҳати "Ливерпуль"ни янги қарорлар қабул қилишга мажбур қилмоқда

"Ливерпуль"нинг ёзги трансфер кампанияси Александр Исакнинг катта шов-шув билан жамоага қўшилиши орқали ажралиб турган эди. Бу харид "қизиллар"ни Европа футболида энг юқори поғонага олиб чиқиш мақсадида амалга оширилган. Бироқ "Тоттенхэм"га қарши ўйинда Исак жиддий жароҳат олгач, клуб қисқа муддатли режаларини қайта кўриб чиқишга мажбур бўлди.

Ушбу жароҳат мавсумнинг ҳал қилувчи босқичида бош мураббий Арне Слотни ҳужумда аниқ таянч футболчисиз қолдирди. "Ливерпуль" Исакнинг оз муддатда соғайиб кетишига умид қилмоқда, аммо ҳозирги асосий вазифа — унинг йўқлигида етарли ҳужум кучини сақлаб қолиш.

Манбаларга кўра, клуб ичида бир қатор юқори савияли футболчилар номзоди муҳокама қилинган. Агентлар соҳасига яқин манбалар бу ҳақда "CaughtOffside" нашрига маълум қилган.

Хусусан, Иван Тоуни ва Душан Влахович энг юқори даражадаги ҳужумчилар сифатида юқори баҳоланмоқда. Аммо улар кўпроқ узоқ муддатли ечим сифатида кўрилмоқда, қишки трансфер ойнаси учун тезкор вариант эмас.

Қизиқ вариантлардан бири сифатида "Пари Сен-Жермен" ҳужумчиси Гонсалу Рамошни олти ойлик ижарага олиш имконияти ҳам кўриб чиқилмоқда. "Ливерпуль" Рамошни қисқа муддатли ечим деб ҳисобламоқда: у босим остида ўйнай олиши ва жарима майдонида тўпни ҳис этиши билан Исак соғайгунча жамоага фойда келтириши мумкин.

Шунингдек, мерсисайдликлар кўп қиррали ҳужумчилар вариантларини ҳам муҳокама қилган. "Реал" футболчиси Родриго ҳамда "Пари Сен-Жермен" вингери Брэдли Баркола ижодкор, ҳаракатчан футболчилар сифатида тилга олинмоқда. Улар классик "тўққизлик" эмас, балки ҳужум чизиғининг турли нуқталарда самарали ҳаракат қила оладиган вариантлар сифатида қаралмоқда.