Ислам Бабаджанов: "Унга чемпион бўлиш истаги қайтган"

Эртага 8 декабрь тонгида АҚШнинг Лас-Вегас шаҳри "UFC 310" турнирига мезбонлик қилади. Ушбу кечанинг асосий кардидан оғир вазн тоифаси вакиллари россиялик Александр Волков ҳамда Франция вакили Сирил Ганнинг жанги ҳам ўрин олган. Биз ушбу қарама-қаршилик борасида,Волковнинг имкониятлари қандайлиги юзасидан Россиянинг нуфузли нашри "Спорт-Экспресс" журналисти Ислам Бабаджановнинг фикрларига қизиқдик. 
- Александр ҳозир руҳий юксалишда, бир нечта муҳим  ғалабалардан сўнг унга чемпион бўлиш истаги қайтган. Агар, устунликлари ҳақида гапирадиган бўлсак, Александрда кучли зарбалар, ажойиб "кик"лар ҳамда "яхшигина "партер" бор. Сирил Ганнинг Фрэнсис Нганну ҳамда Жон Жонс билан жанги кўрсатдики, уни "партер"да бемалол назорат қилиш мумкин. Александр бундан унумли фойдаланади, деб ўйлайман. Шунингдек, францияликка босим ўтказиш ҳам кўп ёқмайди. Бироқ, Ганни "стойка"да ютиш жуда қийин. Шунинг учун унга нисбатан кўпроқ босим ўтказиш ва "партер"да назорат қилиш яхшироқ фойда беради. Қисқа қилиб айтганда мен Волковнинг ғалабасига ишонаман!