Испаниялик футболчи фаолиятини Лондон клубида давом эттириши мумкин

"Атлетик Бильбао" клуби футболчиси Нико Уильямс ўз карьерасини Англияда давом эттириши мумкин. Бу ҳақда "Fichajes" нашри хабар бермоқда.

Манбада ёзилган маълумотларга кўра, испаниялик юлдузнинг хизматларига Лондоннинг икки клуби "Челси" ва "Тоттенхэм" қизиқиш билдирмоқда. АПЛ грандлари Нико учун 70 миллион евро тўлашга тайёр. Бу таклиф эса "Атлетик"ни қониқтириши мумкин. Cабаби, Уильямсга бўлган талаб пасайиб қолган. Ёзда футболчига ПСЖ, "Бавария" ва "Барселона" клублари қизиқиш билдирган эди.

23 ёшли футболчининг ҳозирда трансфер бозоридаги нархи 70 миллион еврони ташкил этади. Унинг Испания клуби билан амалдаги шартномаси 2035 йилгача амал қилади.

Маълумот учун, Нико жорий мавсум "қизил-оқлар" сафида 10 та учрашувда майдонга тушиб, 2 та гол киритди ва 2 та голли узатмани амалга оширди.