Испанлар қандай ютди? Моуриньо мундиал финалини таҳлил қилиб берди

Мадриднинг «Реал» клуби бош мураббийи Жозе Моуриньо 2026 йилги жаҳон чемпионати финалида Испания терма жамоасининг Аргентина устидан (1:0) қозонган ғалабаси ҳақида фикр билдирди. 

- Испаниянинг ўйини ҳақиқатан ҳам ҳайратланарли бўлди. Улар шунчаки жаҳон чемпиони бўлишмади, финалнинг ҳар бир ҳал қилувчи дақиқасини тўлиқ назорат қилди. Ростини айтсам, мен учун ҳам, Аргентинага мухлислик қилган дўстларим учун ҳам ўйин бироз зерикарли туюлди, чунки бир дақиқа ҳам Испания назоратни қўлдан чиқаряпти, деган ҳиссиёт бўлмади.

Фарқ фақат техник маҳоратда эмас, интизомда ҳам намоён бўлди. Испания тўп назоратида устунлик қилди, барча узатиш йўлларини ёпиб қўйди ва Аргентинага ўзлари истаган суръатда ўйнаш имконини бермади. Улар Аргентинага ҳурмат билан ёндашди, лекин бир лаҳза ҳам рақибдан қўрқмади, — деди мураббий.

Моуриньонинг таъкидлашича, жаҳон чемпиони мақомига эга жамоани финалда оддий кўринишга мажбур қила олган терма жамоа ўз кучи ҳақида барчага етарлича маълумот берган ҳисобланади.

- Агар жамоа амалдаги жаҳон чемпионларини финалда шунчалик оддий жамоадек кўрсатиб қўя олса, бунинг ўзи етарли гап. Испания бу ғалабага тўлиқ лойиқ эди. Биринчи дақиқадан то охирги ҳуштакигача энг кучли жамоа бўлиб майдонда турди ва яна бир бор исботлади: футболда ғалаба ўйинни назорат қила олган жамоага насиб этади, таркибида исм-шарифи жуда машҳур бўлган футболчилар тўпланган жамоага эмас, — дея қўшимча қилди Моуриньо.

Эслатиб ўтамиз, Луис де ла Фуэнте шогирдларига ғалаба келтирган ягона голни 106-дақиқада Ферран Торрес урди. Испания тарихида бу жаҳон чемпионатидаги иккинчи чемпионлик бўлди. Илк марта испанлар 2010 йилда жаҳон чемпиони бўлишган эди.