Исраэль Адесанья-Роберт Уиттакер жангида кимнинг имконияти юқори? Ўзбекистонлик яккакураш олами вакиллари жавоб берди

13 февраль куни АҚШнинг Хьюстон шаҳрида “UFC 271” турнири ташкил этилади. Мазкур жанг оқшомининг асосий воқеаси ўрта вазн (- 83.9 кг) тоифасида чемпионлик камари учун амалдаги камар соҳиби Исраэль Адесанья ҳамда Австралия вакили, собиқ чемпион Роберт Уиттакер жанг қилади.

Бу уларнинг реванш жанги бўлиб, дастлабкисида Адесанья нокаут билан ғалаба қозонганди. Бу сафарги тўқнашувда уларнинг имконияти қандай? Биз анъанамизга мувофиқ, ўзбекистонлик яккакураш олами вакилларининг фикрига қулоқ тутдик.

Маҳмуджон Жабборов –блогер

- Океания ҳудудида истиқомат қилаётган бу икки баҳодирнинг реванши орқали биз навбатдаги унутилмас ва бундан анча йиллардан кейин ҳам ёш авлодга ҳикоя сифатида айтиб беришга лойиқ олишув бўсағасида турибмиз, дея айта оламан. Исраэль сўнгги йилларнинг энг доминант чемпионлиги режимига ўтиб олиши бу вазнга бўлган қизиқишни бора-бора сусайтираётгани турган гап. Унда ҳамма нарса етарли: бокс ва кикбоксинг элементлари қоришган стойка мукаммал кўринишда, курашда ҳимоя аъло, нокаут кучи бор, тайминг зўр даражада. Аммо, Роб ҳам биринчи жангдаги аламли мағлубиятдан ўзига хос хулоса чиқаргани бор гап. Буни унинг сўнгги жанглари мисолида кўришимиз мумкин. Албатта, бу иккита ўрта вазн дарғалари ўртасидаги жанг сиз кутган ва кутмаган воқеалар ривожи билан якун топиши мумкин. Мен эса жанг сценарийсини тўлиқ чўзилишини ва унда Уиттакер яна ўз камарини тортиб олишини тахмин қилмоқдаман.

Жаҳонгир Қорабоев -мураббий

- Умуман олганда, ушбу вазн тоифасидаги бир-бирига энг муносиб бўлган рақиблар, жанг жуда қизиқарли ўтиши турган гап. Тўғри, Уиттакер аввалги жангларидан хулоса чиқарган бўлиши мумкин. Бироқ, Адесанья барибир кучли ва у 2 ёки 3-раундда нокаут билан ғалаба қозонади, деган фикрдаман.

Нозимжон Тўйчиев – Ўзбекистон ММА ассоциацияси Андижон вилояти бўлими мутасаддиси

- Очиғини айтганда, менга Роберт Уиттакерни жанг олиб бориш услуби, ўзига хос ҳаракатлари ёқади. Дастлабки жангдаги хатосини бу сафар такрорламаслиги аниқ ва бу сафар унда имконият кўпроқдек туюлмоқда.

Зарруҳ Адашев – ММА жангчиси

- Бу жангга бўлган қизиқиш жуда юқори, сабаби дивизионнинг амладаги ва собиқ чемпионлари яна бир бор дуч келади. Роб бу сафар яхшироқ ҳаракат қилиши мумкин. Аммо барибир Адесаньянинг имконияти юқори ва у очколар ҳисобида ғалаба қозонса керак.

Фарруҳ Мадаминов - мураббийи

- Исраэль Адесанья рақибига нисбатан анчагина мукаммал жангчи ҳисобланади. "Стойка"си кучли, "тэйк-даун"лардан яхши ҳимояланади. Унда ранг-баранглик бор. Роберт Уиттакер ҳам яхши жангчи, Адесанья учун дивизиондаги энг муносиб рақиб, деб биламан. Бироқ, унинг салоҳияти Адесаньяни енгиш учун етарли, деб айта олмайман. Бу жангда яна бир бор нигериялик жангчи ғалаба қозонади. Албатта, бу шахсий фикрим!

Авлиёхон Ҳамидов – ММА жангчиси

- Ҳар иккиси жуда кучли ва чидамли жангчилар ҳисобланади. Роберт Уиттакер ҳам шунчаки совға эмас. Унинг кучли жиҳатлари ҳам бор. Бироқ, Исраэль Адесанья ноодатий жангчи ва унда рақибига нисбатан руҳий устунлик ҳам бор. Чунки аввалги жангда нокаут билан ғалаба қозонганди. Ўйлайманки, бу гал ҳам Адесанья ғалаба қозонади.

Ҳумоюн Ибрагимов – ММА жангчиси

- Менимча бу жангда ғолиб ҳакамлар қарорига кўра аниқланса керак. Чунки, Роберт Уиттакер Адесаньянинг сўнги жангидан ўзи учун яхши хулоса қилган, деб ўйлайман. Яъни унинг камчиликларини ўрганган бўлиш эҳтимоли катта. Лекин барибир Адесанья ғалаба қозонади, деб ўйлайман.

                Ҳумоюддин Мухторов – ММА жангчиси

- Ажойиб жангчилар, ҳар иккисида ҳам кучли жиҳатлар кўп. Атлетизм, кардио, оёқ ва қўл зарбалари, октагонни ҳис қилиш хуллас, бир-бирига мос рақиблар. Ҳозирча Адесаньяда рақибига нисбатан руҳий устунлик бор. Чунки аввалги жангда нокаут билан ғалаба қозонган. Лекин бу салбий таъсир қилиши ҳам мумкин. Сабаби, ушбу устунлик унга хотиржамлик тақдим этиши ва бу панд бериши мумкин. Уиттакер ҳам бу сафар бошқа тактика билан ҳаракат қилса керак, чунки “стойка”да барибир Адесанья кучли. Шунинг учун у кўпроқ “тэйк-дан”ларга ҳаракат қилса керак. Имкониятларни 50/50 деган бўлардим.