Исроил Мадримов билан жанг қилган боксчи уч йилга спортдан четлатилди!

Россиялик машҳур боксчи Магомед Курбанов антидопинг қоидаларини бузганлиги сабабли уч йилга спортдан четлатилди. Бу ҳақда Россия Антидопинг агентлиги (РУСАДА) расмий сайти орқали маълум қилди.

РУСАДА маълумотига кўра, Курбановнинг намуналарида тақиқланган моддалар – дростанолон ва унинг метаболити аниқланган. Ушбу моддалар кучайтирувчи анаболик стероидлар тоифасига киради ва жиддий қоидабузарлик сифатида баҳоланади.

30 ёшли спортчи Бутунроссия антидопинг қоидаларининг 4.1 ва 4.2-бандларини бузган деб топилди. Унинг дисквалификацияси 2025 йил 1 августдан кучга кирган, бироқ вақтинчалик четлатиш муддати – 2025 йил 24 июлдан бошлаб ҳисобга олинади.

Ушбу дисквалификация Курбановнинг спортдаги фаолиятига жиддий таъсир кўрсатиши мумкин. Ҳозирча боксчи ёки унинг жамоаси бу қарорга изоҳ бергани йўқ.

Маълумот учун, Магомед профессионал фаолияти давомида 26 та жангда ғалаба қозониб, 2 марта мағлубиятга учраган. У бир неча йил давомида биринчи ўрта вазн тоифасида WBО International камарининг соҳиби бўлган ва бу вазн тоифасида Россиянинг энг кучли боксчиларидан бири сифатида танилган эди. У профессионал боксдаги илк мағлубиятини ҳамюртимиз Исроил Мадримовдан қабул қилиб қилган.