Ivan Boshkovich: "Bunday o‘yinlar O‘zbekiston chempionati uchun kerak"

Superliganing 6-turidan o‘rin olgan “Andijon” – Co‘g‘diyona” (0:1) uchrashuvidan keyin mehmonlar bosh murabbiyi Ivan Boshkovich matbuot anjumanida qatnashdi.

- Qisqacha to‘xtaladigan bo‘lsam, mana shunday muhitda to‘p surish yoqimli. Bunday o‘yinlar O‘zbekiston chempionati uchun kerak. Birinchi navbatda muxlislarga ajoyib atmosfera tashkil qilganliklari uchun katta rahmat. Mag‘lubiyatmi yoki g‘alabami, asosiysi, ishqibozlar chiroyli uchrashuvga guvoh bo‘ldilar. Birinchi bo‘lim xuddi men kutgandek bo‘ldi. Ikkinchi bo‘limda o‘yinni o‘z qo‘limizga oldik. Birinchisiga nisbatan ikkinchisida yaxshi o‘ynadik. Albatta, raqib ham yaxshi jamoa. Hammasini o‘rganib chiqqandik. Bizga qiyin bo‘lishini bilardik. G‘alabali uchrashuvlarimizni davom ettirishni xohlaymiz. Endi 6-tur. Osmonga uchib bo‘lmaydi, doim erda yurish kerak. Hammasi oldinda. Hali kamchiliklarimiz ko‘p. “Andijon”ga qarshi qiyin bo‘ldi va jangovar tarzda kechdi.

- Bunday atmosferada o‘ynash qiyin bo‘lmadimi?

- Shunday muhit bo‘lishini kutgandik. Hujumlar, muxlislar...hammasini o‘rgangandik. Standart vaziyatlarni ham kutgandik. Biz raqibdan ustun keldik.

- Uchrashuv mobaynida yon chiziq hakamiga bir necha bor e’tirozlar bildirdingiz. Bunga nima sabab?

- Futbolda shunday holatlar bo‘ladiki, qizishib ketasan, kishi. Futbol emotsiyalarga boy o‘yin. Ba’zida o‘zingni ushlab turish oson emas. Bahsli holatlar ko‘p bo‘ldi. Men ham insonman, ayrim paytlarda qizishib ketgandirman. Bu hammada bo‘ladi, sizlarda ham, muxlislarda ham. G‘alabami yo mag‘lubiyatmi, agar raqib yutsa tabriklashga tayyorman. Bugun biz yutdik va bunga loyiq edik.

- Jamoangiz goldan keyin vaqt cho‘zdi. Bu ko‘rsatmangizmidi?

- Xo‘p yaxshi, ayting-chi, men nechta o‘yinchi almashtirdim? Keling, fakt bilan gaplashamiz. Futbolchilarni jarohatlari uchun almashtirdim. “So‘g‘diyona” o‘tgan yili ham toza futbol o‘ynagan. Bu yil ham toza futbol o‘ynayapti. Buni tahlil qilyapman. Uch marta shifokorlarimizni maydonga tushishidan qaytardim. Ba’zida maydonda kam o‘yinchi bo‘lib o‘ynadik.

“Andijon” matbuot xizmati.